Во однос на следната, 2023 година, целите на Агенцијата за промоција и поддршка на туризмот (АППТ), како што посочи директорот на Агенцијата Љупчо Јаневски се преку 3,2 милиони ноќевања и над 430 милиони долари прилив од туристичката индустрија. До 2025 година, пак, очекувањата на туристичкиот сектор се четири милиони ноќевања и девизен прилив од 500 милиони долари
Директорот на Агенцијата за промоција и поддршка на туризмот (АППТ), Љупчо Јаневски, очекува годинава да биде заокружена со зголемен број на туристи и ноќевања, како и со раст на девизниот прилив, а според него, позитивните резултати се веќе видливи.
„Статистичките податоци покажуваат дека бројот на туристите во периодот јануари – јуни 2022 година е зголемен за 75 проценти во однос на истиот период лани. Кај домашните туристи зголемувањето е 25,4, а кај странските 131,3 отсто. Раст има и кај ноќевањата за 66,3 отсто или кај домашните за 29 проценти, а кај странските за 109,2 отсто“,
рече Јаневски на прес-конференција на која ги презентираше Стратешкиот план и програмските активности на Агенцијата за 2023 година.
Тој потсети дека вкупниот девизен прилив во 2020 година изнесуваше 252,05 милиони долари и споредбено со 2021 година кога беа остварени 385,04 милиони долари, евидентиран е раст од 52,76 отсто.
Во однос на следната, пак, 2023 година, целите на Агенцијата, како што посочи Јаневски се преку 3,2 милиона ноќевања и над 430 милиони долари прилив од туристичката индустрија.
Агенцијата најавува многу нови проекти, национална кампања на „Јутјуб“ и „Гугл“, туристичко брендирање на земјава како дестинација, патно означување на туристичките атракции, брендирање на граничните премини, дигитализација, како и градење на платформата е-туризам.
Јаневски посочи дека напорите се насочени кон создавање нов концепт на туризмот со прераснување на Агенцијата во национална туристичка организација (НТО) и креирање услови за третирање на туризмот како во земјите од „Отворен Балкан” и Европа, односно на ниво на министерство, со зголемени ингеренции во делот на формирање туристичка инспекција и туристичка полиција.
„Туризмот не познава територијални граници, туку само дестинации, а тие се протегаат до каде што туристите имаат интерес да патуваат и истражуваат. Концептот на ‘Отворен Балкан’ е со отворени можности за сите држави кои ја споделуваат оваа економска визија, која ќе создаде конкурентна дестинација во многу аспекти од туристичката индустрија. Градејќи ги мостовите со регионот за брзо патување преку т.н. зелени зони, треба да размислуваме за нови инвестиции, технологии и дигитализација, промотивни активности и намалување на сезоналноста“,
изјави Јаневски.
Во таа насока, директорот на Агенцијата оцени дека закрепнувањето на туризмот треба да биде зелено, односно, како што посочи, неопходно е искористување на обновливите извори на енергија и зачувување на животната средина со цел развој и практикување на одржливи форми на туризам.
Очекувањата на туристичкиот сектор до 2025 година се четири милиони ноќевања и девизен прилив од 500 милиони долари.