Во меѓувреме, се појавија измамници кои посетуваат домови и се претставуваат како службеници на здравствените институции, при што цел се постари граѓани
Бројот на потврдени случаи на новиот коронавирус во Грција се искачи на 66, откако вечерва е потврден 21. нов случај. Од вкупниот број заразени дури 51 случај е поврзан со групата што била на аџилак во Израел и Египет. Поточно станува збор за 47 членови на групата и четири нивни контакти.
Според Министерството за здравство на Грција, 22 лица се хоспитализирани во болници во Солун, Атина и Патра, еден заразен со Ковид-19 и понатаму е со сериозна пневмонија згрижен во одделот за интензивна нега во Патра, а 43 се во домашна изолација. Продолжува и проверката на контактите на новите случаи.
Во меѓувреме, во Грција се појавија измамници кои посетуваат домови на граѓани и се претставуваат како службеници на Националната организација за јавно здравје или на Министерство за здравство, јави МИА од Атина.
Од грчката полиција соопштуваат дека, по добиените пријави, има случаи кога лица посетуваат домови и тврдат дека се задолжени за информирање за коронавирусот или делат конкретни летоци со информации.
„Согласно информациите од Министерството за здравство, не постојат претставници на службит кои ги посетуваат домови за таков вид информирање. Очигледно е дека станува збор за обид за измама. И во случај да се препознае таков обид, се молат граѓаните веднаш да ја известат полицијата“,
соопштуваат од грчката полиција.
Според медиумите во Грција, веќе имало неколку случаи кога измамниците тврделе дека се задолжени за информирање или пак за дезинфекција на становите, само за да влезат во домовите, а најчесто цел биле постари лица.