Заразата со хантавирусот не може да се спореди со корона-пандемијата, вели шефот на Светската здравствена организација. Тој денеска ги убедуваше жителите на шпанскиот остров Тенерифе дека нема опасност од ширење на вирусот и покрај тоа што бродот на кој изби заразата треба да вплови во нивно пристаниште
Шефот на Светската здравствена организација (СЗО), Тедрос Аданом Гебрејесус денеска им порача на жителите на шпанскиот остров Тенерифе, најголемиот во Канарските Острови, дека ризикот од ширење на хантавирусот е низок, додека бродот „Хондиус“, на кој изби заразата, се упати кон нив и треба да пристигне во недела рано наутро.
Гебрејесус истакна дека заразата не може да се спореди со пандемијата на коронавирусот и додаде дека е свесен оти луѓето се загрижени.
„Болката од 2020 година е сè уште присутна и не ја занемарувам ниту за миг. Но, сакам јасно да ме слушнете – ова не е уште еден ковид. Моменталниот ризик по јавното здравје од хантавирусот и понатаму е низок“,
изјави тој.
Гебрејесус исто така рече дека во моментов на патничкиот бродот „Хондиус“ нема патници со симптоми на вирусот. Бродот би требало да вплови во пристаништето Гранадиља, во јужниот дел на Тенерифе, во недела наутро, меѓу четири и шест часот, додека истоварувањето на патниците ќе се одвива постепено.
Тој рече дека патниците ќе бидат пренесени во индустриското пристаниште, а потоа ќе бидат транспортирани со затворени возила под надзор пред да одлетаат во своите земји. Потенцираше дека и тој самиот ќе присуствува на самото место.
„Нема да ги сретнете. Вашите семејства нема да ги сретнат. Тенерифе е избран затоа што има здравствени капацитети, инфраструктура и хуманост за патниците да стигнат до безбедно место. И затоа што длабоко верувам во тоа, и јас самиот ќе бидам таму“,
додаде тој.
Заедно со Гебрејесус ќе бидат и шпанските министри за здравство и за внатрешни работи за да се осигура координација меѓу владините агенции, следење на здравствената состојба и спроведување на планираните протоколи за надзор и одговор.
Истоварувањето на патниците мора да заврши меѓу недела напладне и понеделник, што е единствената временска рамка поради метеоролошката ситуација, нагласи претставник на регионалната влада на Канарските Острови.