Оние кои одбиваат да се вакцинираат ќе треба да си најдат друга работа, рече британскиот министер за здравство, Саџид Џавид
Задолжителна вакцинација против ковид за сите вработени во домовите за стари и изнемоштени лица во Британија, најавија тамошните здравствени власти. Оние пак кои одбиваат да се вакцинираат ќе треба да си најдат друга работа, рече британскиот министер за здравство, Саџид Џавид.
Тој ги отфрли барањата на домовите за привремено суспендирање на одлуката за задолжителна вакцинација на вработените во домовите поради можноста некои домови да не можат да функционираат доколку останат без дел од работниците.
Надра Ахмед, претседателка на Националната асоцијација за нега, побара од Владата да даде рок до 11 ноември како краен датум до кога вработените треба да добијат две дози од вакцината. Меѓутоа, Џавид рече дека оние кои не се подготвени да се вакцинираат не треба да работат во домови за стари и изнемоштени лица.
„Ако работите во дом за стари и изнемоштени лица, тогаш работите со некои од најранливите луѓе во нашата земја. Ако не сте подготвени да се вакцинирате, одете и најдете друга работа“,
рече Џавид за Би-Би-Си радио 4.
Во моментов во британските домови за стари лица целосно вакцинирани се 86 проценти од персоналот.
„Ние не сме против вакцините, само велиме дека ни треба повеќе време“,
рече Ахмед.