Препораката од британскиот Комитет за вакцинација и имунизација е да се понуди дополнителна доза на граѓани со слаб имунитет и на оние над 50 години со цел да се зголеми индивидуалната заштита пред зимата
Британија ќе понуди трета доза од вакцините против ковид за лица на возраст над 50 години, како и за оние што припаѓаат во ризична здравствена група.
Ова го најави британскиот министер за здравство, Саџид Џавид, кој информираше дека го прифатиле предлогот на Комитетот за вакцинација и имунизација.
Според најавите давањето на трета доза на одредените групи ќе започне следната недела.
Светската здравствена организација побара од богатите земји да ја одложат вакцинацијата со третата доза додека секоја земја не вакцинира најмалку 40 проценти од населението.
Препораката пак од британскиот Комитет за вакцинација и имунизација е да се понуди дополнителна доза на граѓани со слаб имунитет и на оние над 50 години со цел да се зголеми индивидуалната заштита пред зимата.
Според образложението на Комитетот потребна е третата доза како засилувач за ризичните групи, бидејќи студиите покажале дека имунитетот стекнат со вакцината слабее со текот на времето.
Дополнителна трета доза, освен за лицата постари од 50 годинии, се препорачува и за здравствени работници, за лица со ослабен имунитет и за оние кои живеат или работат со луѓе со ослабен имунолошки систем. Препораката е дека третата засилувачка доза против ковид треба да се прими најмалку шест месеци по втората доза.
Комитетот ја препорачува вакцината на „Фајзер“ за трета доза или половина доза од вакцината на „Модерна“, додека пак во случаи каде што не може да се прими мРНА вакцина да се даде од вакцината Астра Зенека.