Валентина Божиновска во изјава за „А1он“ вели дека нема да може да биде дел од Стратегискиот совет на министерот за надворешни работи, Бујар Османи, но дека се надева на идна соработка.
„Почитуван министре, Ви благодарам за поканата и за Вашата идеја, која е брилијантна и во оваа прилика ја поздравува, но заради моите ограничени активности од здравствени причини, не можам да придонесам во овие мигови, но се надевам на наша идна соработка бидејќи сум убедена дека сите заедно треба да ги подадеме рацете кон проектот за европска држава“,
вели Божиновска.
Стратегискиот совет за надворешна политика што го формира шефот на дипломатијата беше промовиран денеска и засега брои 25 члена. Името на Божиновска, која е поранешна пратеничка на ВМРО-НП, а потоа беше и функционерка во времето на ВМРО-ДПМНЕ, е меѓу оние кои предизвикаа најмногу реакции во јавноста.
Покрај неа, во советничкиот тим на Османи има двајца поранешни министри за надворешни работи: Денко Малески – првиот шеф на македонската дипломатија и универзитетски професор и Срѓан Керим – министер владата на Љубчо Георгиевски, а во периодот 2007-2008 година беше претседател на Генералното собрание на ОН. Во тимот се и: поранешниот министер за одбрана во првиот кабинет Никола Груевски на „Илинденска“, а до скоро и специјален пратеник на Владата во НАТО, Лазар Еленовски; експратеничката Ивана Туфегџиќ; некогашниот пратеник и потпретседател на СДСМ, Гордан Георгиев; академиците Луан Старова и Абдулменаф Беџети; поранешниот амбасадор и универзитетски професор Нано Ружин; директорот на „Алкалоид“, Живко Мукаетов и др.
Целосната изјава на Божиновска можете да ја прочитате ТУКА.