Бугарскиот премиер Бојко Борисов на својот фејсбук-профил објави дека добил негативен тест на ковид-19 и ќе може денеска да се сретне со македонскиот премиер Зоран Заев и заедно да претседаваат со самитот за Западен Балкан на Берлинскиот процес.
„Негативен сум на ковид-19. Тоа го покажа вториот последователен тест. Со согласност од здравствените власти, можам да се сретнам со премиерот на Република Северна Македонија, Зоран Заев и да ја водиме средбата на врвот на Берлинскиот процес“,
пишува Борисов на Фејсбук.
Во меѓувреме, од Владата соопштија дека Заев пристигнал во Софија.
„Пристигнавме во Софија за да учествуваме на лидерскиот Самит за Западен Балкан во рамките на Берлинскиот процес. Отвораме ново поглавје во развојот на регионот и за остварување на стандардите кои земјите од нашиот регион ги ставаат поблиску до членството во ЕУ. Денеска ќе имаме можност да дискутираме за клучните стратегиски насоки за нашиот регион, за визијата за заедничкиот регионален пазар и за зелената агенда за Западен Балкан. И во оваа прилика посебна благодарност упатуваме и до иницијаторот на Берлинскиот процес, канцеларката Меркел и на СР Германија, од кои континуирано добиваме силна поддршка за европската перспектива на Западен Балкан и на регионалната соработка“,
пишува во соопштението од Владата.
Борисов и Заев денеска ќе претседаваат со самитот на Берлинскиот процес, кој заради пандемијата со ковид-19 ќе се одржи преку видеоконференциска врска. На самитот ќе учествуваат германската канцеларка Ангела Меркел, на чија иницијатива започна и се спроведува Берлинскиот процес, како и претставник на Европската ломисија, генералната секретарка на Регионалниот совет за соработка Мајлинда Брегу и директорот на Секретаријатот на ЦЕФТА, Емир Џикиќ.
На пленарната сесија на самитот се очекува да учествуваат лидерите на земјите од Западен Балкан, како и заменик-претседателот на Европската комисија Жозеп Борел и еврокомесарот за соседство и проширување Оливер Вархеји.