Високиот претставник за надворешна и безбедносна политика на ЕУ, Жозеп Борел, и еврокомесарот за проширување, Оливер Вархеји, во заедничка писмена изјава го поздравија спроведувањето на изборите во земјава и граѓаните кои излегоа да гласаат.
„Според првичните наоди и заклучоци на меѓународните набљудувачи од Канцеларијата на ОБСЕ за демократски институции и човекови права (ОДИХР), изборите генерално се се спроведоа добро и со извесни приспособувања поради пандемијата, а кампањата беше навистина натпреварувачка, но правната стабилност беше поткопана со значителни ревизии на правната рамка и последователните владини уредби“,
се вели во заедничката изјава.
Борел и Вархеји очекуваат дека откако ОБСЕ / ОДИХР ќе ги издаде своите препораки за идните избори, сите политички субјекти и институции ќе продолжат да работат заедно за да ги спроведат тие препораки пред следните избори.
„Со нетрпение очекуваме да работиме со силен парламент и стабилна владина коалиција кои треба да испорачаат резултати во однос на стратегиската цел на земјата за интеграција во ЕУ и да одговорат на очекувањата на граѓаните. Посветени сме да продолжиме заеднички да одговараме на пандемијата со ковид-19 и последици од неа. Очекуваме властите да продолжат да ги исполнуваат обврските на земјата кон ЕУ, да го одржат и забрзаат спроведувањето на реформите поврзани со ЕУ, особено во областа на владеењето на правото, борбата против организираниот криминал и корупцијата, како и дополнително да ги зајакнат добрососедските односи“,
порачуваат Борел и Вархеји.
На крајот од изјавата двајцата потврдуваат дека Европската Унија ќе продолжи да ја поддржува Северна Македонија на нејзиниот пат кон ЕУ и дека со нетрпение очекуваат што поскоро одржување на првата меѓувладина конференција.