Протестот ќе започне на 1.5.2022 година во 12:30 часот пред зградата на Сојузот на синдикатите на Македонија во Скопје, а ќе заврши пред Владата каде што ќе бидат упатени барањата на работниците за најмалку 2 806 денари нето-износ линеарно зголемување на сите плати во приватниот и во јавниот сектор од 1 мај годинава
Порачуваме дека не е време за салата и скара, време е за борба за твојата плата и за работнички права. Ако не се бориш за себе и имаш добра плата, треба да бидеш солидарен и да се бориш за тие околу тебе кои немаат добра плата и немаат за добар живот, стои во фејсбук-објавата на Сојузот на синдикати на Македонија (ССМ) во пресрет на првомајскиот протест кој го организираат со барање за линеарно зголемување на платите.
„ССМ смета дека е дојдено време секој еден работник, членството на синдикатите, работниците и граѓаните, сите синдикати како наши браќа и сестри-синдикалци и борци за работнички права да излезат на голем синдикален протест кој отпочнува токму на Меѓународниот ден на трудот – Први мај“,
стои во објавата на ССМ во која упатуваат повик до сите работници и синдикални организации да излезат на протестот на 1 Мај.
Главното барање на ССМ, како што досега споменаа повеќе пати, е најмалку 2 806 денари нето-износ линеарно зголемување на сите плати во приватниот и во јавниот сектор од 1 мај годинава.
„Ги повикуваме сите работници, братските синдикати (конфедерации, унии и сојузи) и граѓани кои ги препознаваат вредностите и заложби за зголемување на платите да се приклучат во борбата заедно со семејството на ССМ, и заедно како семејство на рамноправни членови, синдикати, работници и граѓани, кои не сакаат само да критикуваат туку сакаат директно да се вклучат во борбата за поголеми плати на 1 Мај 2022 година да излезат на голем синдикален протест на кој ќе кажеме гласно дека зголемувањето на платите на работниците мора да се случи веднаш“,
со додава во соопштението од ССМ.
Како што додаваат од Сојузот, нема оправдување за секој оној што на 1 мај ќе реши да оди на пикник или ќе остане дома, наместо да излезе на протест, зашто таму нема никој да го слушне и да го види дека му треба поголема плата, а на таков начин не си помага ниту себеси ниту на другите.
Повеќе од 700 000 работници во државата, посочуваат од ССМ, се директно засегнати од потребата од зголемување на нивните плати.
„Во декември 2021 бевме на улица и добивме недела неработен ден, во февруари 2022 година бевме на улица и добивме 18 000 денари минимална плата. На 1 Мај 2022 година мора да бидеме на улица за да добиеме зголемување на сите плати на сите работници, не дозволувај ти да не си еден од 700 000 работници кои не се бореле и не биле дел од борбата за работнички права“,
додаваат од ССМ.
Протестот ќе започне на 1.5.2022 година во 12:30 часот пред зградата на Сојузот на синдикатите на Македонија во Скопје, а ќе заврши пред Владата каде што ќе бидат упатени барањата на работниците.