Доколку претходниот менаџмент обезбедел уште две-три машини кои ќе можеа да печатат, не по три, туку по шест илјади патни исправи на ден, немаше да мора да се чека два месеци, туку многу пократко, рече Тошковски
Над 100 илјади граѓани ги немаат добиени пасошите во законскиот рок, кажа дополнителниот заменик-министер Митко Бојмацалиев посочувајќи ја вината за застојот во издавањето документи кај првиот човек на МВР, Панче Тошковски.
Според Бојмацалиев, пред техничката влада, граѓаните ги добивале личните документи во рок од 15 дена.
„Но за среќа техничката влада завршува за брзо па ќе ги вратиме управните служби на прав колосек, граѓаните ќе бидат сликани и услужени за 15 дена да ги имаат своите документи. Тоа го зборував уште од првиот ден, но не наиде на разбирање дека не е само да ги сликаме граѓаните, да им ги земеме парите, а да не им ги дадеме пасошите. Граѓаните чекаат некаде веќе два и пол месеци за одредени документи за кои уредно си платиле и се сликале“,
потенцира Бојмацалиев.
Тошковски возврати дека над 30 илјади обрасци за патни исправи во текот на вчерашниот ден стигнаа во Македонија и тие се во магацинот на МВР. Тој му порача на Бојмацалиев да не ја манипулира јавноста, затоа што виновник за застојот во издавањето документи е претходното раководство на МВР.
„Доколку претходниот менаџмент обезбедел уште две три машини кои ќе можеа да печатат, не по три, туку по шест илјади патни исправи на ден, немаше да мора да се чека два месеци туку многу пократко, но фактот е таков и ги замолувам политичарите во наредниот период да не расфрлаат пердуви и да не ја манипулираат јавноста заради тоа што македонскиот народ е многу умен и знае како било досега и гледа разлика како е сега за овие два месеца кои изминаа“.
кажа Тошковски.