Сојузот на средношколци бара поддршка од пратениците во Собранието за нивното барање да полагаат два, наместо четири предмети во рамки на државната матура. Тие се обратиле до пратениците, бидејќи како што се наведува во писмото, Министерството за образование и наука ги игнорира и е децидно во одбивањето на било каков компромис по ова прашање.
Претседателот на Сојузот Бленди Ходаи за МИА изјави дека бојкотот денеска го завршуваат, а утре ќе одлучат за следните чекори, односно дали ќе се вратат на онлајн-настава од понеделник или ќе организираат протест.
„Претставници од матурантите во Сојузот утре ќе одлучуваме што ќе правиме од наредната недела. Осум дена бевме во бојкот и ќе одлучиме што е подобро за матурантите. Многу од нив се изнервирани од случувањата помеѓу Сојузот и МОН. Можеби ќе има порадикален чекор, како протест или слично, или ќе одлучиме да престанеме со бојкотот и да се вклучиме во наставата. Сè уште не се знае, ќе дискутираме утре и ќе се гласа што ќе се прави. Од разговори што вчера ги имав со неколку пратеници во Собрание, има индиции дека во понеделник може да се иницира дебата во Собранието. Така што, ќе видиме и пратениците дали и што ќе направат во наредните денови“,
изјави Ходаи.
Доколку МОН не покаже добра волја, Сојузот бара од пратениците измени на Законот за средно образование во кои како што велат јасно ќе биде наведено дека одредбите се привремени, т.е. се однесуваат само за учебната 2020/2021 година.
„Министерката Царовска е категорична дека државната матура треба да содржи четири предмети. Поради тоа, од вас како директни преставници на граѓаните и, пред сè, контролори на извршната власт бараме јавна поддршка за нашите барања и повикувања кон МОН нив да ги исполни; користење на вашето влијание како државни службеници за МОН конечно да се вразуми; и доколку Министерството не покаже добра волја и продолжи со својот безобѕирен однос – изготвување и донесување на законско решение кое ќе ги вклучи нашите барања. Ако дури и Вашата поддршка се покаже како залудна, единственото преостаното решение е Собранието да го измени Законот за средно образование, којшто МОН мора да го почитува“,
пишува во писмото кое Сојузот на средношколците и нивниот претседател Ходаи го доставиле до 85 пратеници односно до оние кои на официјалната страница на Собранието имаат наведено контакти по електронска пошта.
Во упатеното писмо до пратениците за поддршка на нивното барање да полагаат два предмета – мајчин јазик (македонски, албански или турски) и втор предмет од областа која матурантот планира да ја студира, Сојузот истакнува дека државата не смее да ги игнорира последиците на неквалитетната настава на далечина.
„Дури и кога наставата од далечина би била беспрекорна, интеракцијата меѓу матурантите и професорите e значително намалена. Исто така, младите се гневни бидејќи генерацијата пред нив не полагаше матура, а продолжи во високото образование, та зошто би било поразлично за нив? Токму затоа нашите барања имаат за цел да произведат позитивен исход врз сите засегнати страни“,
пишува во писмото.
Сојузот на средношколци во писмото додава дека целосно ја разбира потребата од државна матура, но дека, сепак, пандемијата покажа дека образованието може да функционира и без нејзино одржување, притоа повикувајќи се на Уредбата со законска сила на Владата од мај 2020 година, со која матурантите од минатата учебна година беа ослободени од овој завршен испит поради, како што стои во нивното писмо „неподготвеноста на образовниот систем да организира толкав потфат и неискусноста на општеството со наставата од далечина“.