Министерството за транспорт и врски соопшти дека ги почна консултациите со релевантните институции и асоцијации во однос на Законот за утврдување правен статус на бесправно изградените објекти. Министерот Благој Бочварски денеска имаше работна средби со Асоцијацијата на архитекти, а учествуваше и на дебатата за овој закон што ја организираше Антикорупциската комисија.
Министерството информира дека на средбите се разговараше за измени и дополнување на Законот во насока на подобрување на делови од законското решение и ставање во правна рамка на нелегалните објекти пред повторно Законот да се разгледува во Собранието и дека биле понудени дополнителни предлози на законското решение со цел подобрување на условите за утврдување правен статус на бесправно изградените објекти.
„Како што најавив, веќе ја отворивме стручната дебата околу Законот за утврдување правен статус на бесправно изградените објекти. Денеска имавме одлична средба со Асоцијацијата на архитекти, а учествував и на јавната расправа во организација на ДКСК. Се дадоа предлози во насока на подобрување на Законот и во следните денови сите предлози детално ќе ги разгледаме и ќе ги усогласуваме заеднички. Нашата намера е преку отворена дебата со сите заинтересирани страни, ЗЕЛС, граѓански здруженија и асоцијации, пратенички групи, да го подобриме законското решение и да понудиме подобри и фер можности за утврдување правен статус на бесправно изградените објекти“,
рече министерот Бочварски.