Ќе бараме помош од сите засегнати институции, од повисоките инстанци на власта. Ќе бараме помош директно од премиерот на Република Македонија затоа што тој е премиер на сите граѓани, а ние сме дел од тие граѓани. Засегнати сме директно и бараме помош, медијација, каква било форма ќе бараме и од него, велат од „Слобода превоз“
Приватните автобуски превозници од „Слобода превоз“ и „Макекспрес“ и денеска ги продолжуваат протестите, но овој пат блокадите ќе бидат само пред бараките на Град Скопје. Според најавите, блокадите денеска ќе бидат на булеварот „Илинден“, а другите раскрсници што изминатите денови беа блокирани ќе бидат ослободени за движење. Булеварот „Илинден“ ќе биде блокиран во сите четири ленти, на потег од зад Владата кон Карпош до „Алумина“.
По вчерашниот координативен состанок на превозниците соопштија дека од денеска ќе бараат помош директно од премиерот Димитар Ковачевски, за тоа што градоначалничката нема намера да разговара со нив.
„Колку пати веќе баравме средба со градоначалничката на Град Скопје. Колку пати вие медиумите ја чекавте да ви даде изјава. Таа нема намера да разговара ниту со вас, ни со нас бидејќи ги нема аргументите. Да ги имаше аргументите и да беше во право многу, многу одамна ќе излезеше и ќе се разјаснеа работите. Ќе бараме помош од сите засегнати институции, од повисоките инстанци на власта. Ќе бараме помош директно од премиерот на Република Македонија затоа што тој е премиер на сите граѓани, а ние сме дел од тие граѓани. Засегнати сме директно и бараме помош, медијација, каква било форма ќе бараме и од него“,
изјави вчера Ќемал Муриќ од „Слобода превоз“.
Од Град Скопје пред два дена најавија дека ќе биде објавен нов јавен повик за приватните автобуски превозниците на линиите со број 20 и 22.
„Ги повикуваме сите приватни превозници да аплицираат на објавениот јавен повик, индивидуално или преку претставник на група на приватни превозници“,
се вели во соопштението на Градот.
Генералниот секретар на Град Скопје, Зоран Глигоров завчера рече дека за овој јавен повик има огромен интерес.
На овој повик, според објаснувањата од Градот, не може да конкурираат единствено „Слобода превоз“ и „Макекспрес“ бидејќи не ги почитувале договорите за што им беше испратено и известување за раскин. Но, одделно може да конкурираат сопствениците на автобуси кои беа здружени во овие две здруженија.
Муриќ вчера потврди дека остануваат на ставот ниту еден превозник да не се јави на јавниот повик од страна на Град Скопје, посочувајќи дека тоа е само обид за разединување и разбивање на единството на приватните превозници.
„Тој оглас прво е многу некоректно направен и некоректно поставен. Зошто? Нека ни го исплатат долгот што ни го должат, нека ни ги презентираат условите па да разговараме. Меѓутоа, без да ни го исплатат долгот и без да не вклучат како неправедно исклучени од сообраќај, како што најавувавме и порано, работите во од да се решаваат ни на крај памет не ни е, на ниту еден од нас тука, одговорно ви тврдам. Значи, тоа е една фарса и обид за разнебитување и разединување на приватните превозници што ви гарантирам дека нема да се случи“,
рече Муриќ.
Директорот на „Слобода превоз“ Ленин Јовановски, во средата, изјави дека целосно се повлекува од неговата улога во протестот на приватните превозници во чие име зборуваше во изминатиот период, како што рече, да не се злоупотребува неговото име, а блокадите остануваат и понатаму. Во однос на новиот јавен повик од страна на Град Скопје, тој рече дека никој од превозниците присутни на протестот кои досега ја извршуваа својата дејност нема намера да се пријави, доколку долгот не биде расчистен.
Приватните превозници бараат од Град Скопје да се подмири долгот кон двете компании кој во целост изнесува преку 90 милиони денари, затоа што, како што велат, немаат средства за понатамошно функционирање поради недостиг на средства.