Според предлогот кој се очекува да биде одобрен од американскиот Конгрес, една милијарда долари од вкупната сума ќе ѝ бидат доделени на Украина, а остатокот ќе биде поделен меѓу Албанија, БиХ, Северна Македонија, Бугарија, Хрватска, Чешка, Естонија, Грузија, Грција, Косово, Летонија, Литванија, Молдавија, Црна Гора, Полска, Романија, Словачка и Словенија
Американскиот државен секретар Ентони Блинкен денеска пристигна во ненајавена посета на Киев во време кога американската администрација најави нова воена помош вредна над две милијарди долари за Украина, но и за 18 други земји за кои се смета дека се загрозени од руски напад, меѓу нив и Северна Македонија.
Блинкен рече дека администрацијата на претседателот Џо Бајден го информирала Конгресот за својата намера да обезбеди две милијарди долари долгорочно воено финансирање за Украина и 18 нејзини соседи, вклучително и членките на НАТО и регионалните безбедносни партнери кои се „потенцијално најмногу во ризик од идна руска агресија“.
Според предлогот кој се очекува да биде одобрен од американскиот Конгрес, една милијарда долари од вкупната сума ќе ѝ бидат доделени на Украина, а остатокот ќе биде поделен меѓу Албанија, БиХ, Бугарија, Хрватска, Чешка, Естонија, Грузија, Грција, Косово, Летонија, Литванија, Молдавија, Црна Гора, Северна Македонија, Полска, Романија, Словачка и Словенија.
Во соопштението на Стејт департментот се наведува дека помошта ќе биде дадена за да им се помогне на тие земји да одвратат и да се одбранат од новите закани за нивниот суверенитет и територијален интегритет преку зајакнување на нивната воена интеграција со НАТО за да се спротивстават на руското влијание и агресија.
„Оваа помош уште еднаш ја покажува нашата непоколеблива посветеност на иднината на Украина како демократска, суверена и независна земја, како и на безбедноста на сојузниците и партнерите во целиот регион“,
се вели во соопштението.
Ова доаѓа неколку часа откако американскиот секретар за одбрана Лојд Остин рече дека администрацијата на претседателот Џо Бајден за Украина одобрила дополнително оружје, муниција и оклопни возила во вредност од 675 милиони долари.