Претставниците на Хамас и Исламски џихад на состанокот во Катар денеска повторија дека секој договор ќе мора да вклучува целосен крај на војната, сеопфатно израелско повлекување од Појасот Газа, реконструкција на крајбрежниот појас и крај на блокадата
Американскиот државен секретар Ентони Блинкен денеска во Ерусалим се сретна со израелскиот премиер Бенјамин Нетанјаху како дел од тековните напори за постигнување прекин на огнот во војната во Газа. Утре наутро Блинкен треба да се сретне со израелскиот претседател Исак Херцог.
Блинкен претходно денеска во Египет се сретна со претседателот Абдел-Фатах ал-Сиси. По средбата, американскиот секретар рече дека само палестинската исламистичка група Хамас не се согласила со планот за прекин на огнот што го претстави американскиот претседател Џо Бајден.
„Значи, единствената страна што не прифати, единствената страна што не кажа ‘да’ е Хамас. Тоа е она што сите го чекаат. Но, јасно е дека буквално целиот свет се обедини за да го поддржи предлогот и единственото отворено прашање е дали Хамас ќе каже да“,
рече Блинкен.
Блинкен ги повика владите на Блискиот Исток да извршат притисок врз Хамас да го прифати предлогот на Бајден за прекин на војната во Газа.
Претставниците на Хамас и Исламски џихад на состанокот во Катар денеска повторија дека секој договор ќе мора да вклучува целосен крај на војната, сеопфатно израелско повлекување од Појасот Газа, реконструкција на крајбрежниот појас и крај на блокадата.
Бајден претстави нацрт за договор од три фази за прекин на борбите во Газа, за што Израел веќе се согласи, според САД.
„Прво, дозволете ми да бидам многу јасен: Израел го прифати предлогот. Всушност, тие беа критични кога го изнесоа“,
рече Блинкен во изјава за медиуми во Каиро.
Сепак, израелската влада сè уште не дала јасно и јавно одобрение за планот, пренесува ДПА.
Минатата недела израелскиот премиер изјави дека израелските услови за прекин на војната не се променети. Тие вклучуваат целосно уништување на Хамас и ослободување на сите заложници.