Во вчерашната дебата со поранешната државна секретарка на САД, Кондолиза Рајс, на Универзитетот Стенфорд, Блинкен рече дека мирот и стабилноста меѓу Кина и Тајван успешно се одржувале со децении, но оти Пекинг го променил својот пристап
Високи американски и тајвански воени лица предупредија дека Кина ќе биде способна за спроведување на ваквото сценарио во рок од неколку години, додека аналитичарите посочуваат дека планот на Си за „национално подмладување“ на земјата може да се случи до 2049 година, кога ќе се одбележи стогодишнината од Народна Република Кина, како потенцијален краен рок
Кинеската влада ги спроведува плановите за анексија на Тајван во „многу побрза временска рамка“ под раководство на претседателот на Кина, Си Ѓинпинг, вели американскиот државен секретар Антони Блинкен и потсетува на предупредувањата за глобални економски нарушувања доколку Тајван биде припоен кон Кина, пишува „Градијан“.
Коментарите на Блинкен доаѓаат по конгресот на Комунистичката партија во Кина, втор во една деценија, на кој Си во својот говор во неделата јасно стави до знаење дека плановите за Тајван заземаат централно место во неговата агенда за „подмладување“ на Кина.
Во вчерашната дебата со поранешната државна секретарка на САД, Кондолиза Рајс, на Универзитетот Стенфорд, Блинкен рече дека мирот и стабилноста меѓу Кина и Тајван успешно се одржувале со децении, но оти Пекинг го променил својот пристап.
„Наместо да се држи до статус квото што беше воспоставено на позитивен начин, Пекинг донесе фундаментална одлука дека статус квото повеќе не е прифатливо и е решен да продолжи со обединувањето во многу побрза временска рамка…Доколку мирните средства не функционираат, тогаш би користеле средства за принуда, а евентуално ако средствата за присилба не функционираат, тогаш можеби ќе посегнат и по насилни средства за да ја постигнат својата цел. Тоа е она што длабоко го нарушува статус квото и создава огромни тензии“,
рече Блинкен.
Во последниве години Комунистичката партија на Кина и нејзината војска – Народноослободителната армија, ги интензивираа активностите на заплашување кон Тајван, што вклучува и речиси секојдневни летови во зоната за идентификација на воздушната одбрана на островот и други дејства во сивата зона. Како наводен одговор на посетата на американскиот спикер Ненси Пелоси, кинеската војска организираше големи воени вежби околу главниот остров на Тајван во август, и оттогаш значително ги зголеми воените премини преку линија на разграничување.
Додека Пекинг јасно стави до знаење дека има намера да го припои Тајван, временската рамка за такво сценарио многу варира. Високи американски и тајвански воени лица предупредија дека Кина ќе биде способна за спроведување на ваквото сценарио во рок од неколку години, додека аналитичарите посочуваат дека планот на Си за „национално подмладување“ на земјата може да се случи до 2049 година, кога ќе се одбележи стогодишнината од Народна Република Кина, како потенцијален краен рок.
Се верува дека американските разузнавачки информации за Кина се минимални во споредба со нивните разузнавачки информации за Русија. Во 2010 година беше објавено дека кинеските власти разбиле американски шпионски синџир во земјата убивајќи или затворајќи до 20 извори на ЦИА.
Дел од аналитичарите кои вршат проценки на неделниот говор на Си Ѓинпинг, како и на подолгиот „работен извештај“ во кој е претставена неговата визија за следниот мандат барајќи знаци за неговите планови за Тајван, забележуваат дека раното појавување на Тајван во говорот е знак за неговата зголемена приоритетност. Други, пак, сугерираат дека јазикот користен во говорот покажува дека Си ниту ја ескалирал ниту ја отфрлил реториката околу прашањето за островот, но покажал зголемена фрустрација за „странското мешање“ во она што тој го смета за домашна работа.
Прашањето за Тајван му беше поставено на Блинкен во последните минути од едночасовната дебата. Тој предупреди дека дестабилизацијата на Тајванскиот Теснец предизвикува „длабока загриженост за земјите ширум светот“.
„Количината на комерцијален сообраќај што секојдневно минува низ теснецот и има влијание врз економиите ширум светот е огромна. Ако тоа се наруши како резултат на криза, земјите ширум светот ќе страдаат“,
рече Блинкен.
Зборувајќи за новинарите по настанот, Блинкен укажа на глобалната криза надвор од Кина велејќи дека војната во Украина го донела крајот на „ерата по Студената војна“, а технологијата е она што ќе ја дефинира конкуренцијата меѓу светските сили.
„Ние сме на точка на свртување. Технологијата на многу начини ќе ги преуреди нашите економии. Ќе ги реформира нашите војски. Тоа ќе ги преобликува животите на луѓето ширум планетата“,
вели американскиот државен секретар.
САД овој месец воведоа ограничувања за извозот на кинеска технологија, што почна да предизвикува големо влијание врз способноста на земјата да го зголеми домашното производство на чипови.