На конгресот, кој ќе се одвива претежно зад затворени врати, учесниците ќе изберат околу 200 члена на Централниот комитет на партијата, кој потоа избира 25 члена на Политбирото и на семоќниот Постојан комитет, највисокото раководно тело во државата
Кинескиот претседател Си Ѓинпинг се очекува да добие историски трет мандат како лидер на земјата на 20-от Конгрес на кинеската Комунистичка партија, кој почнува во недела.
Ако сè оди според планот, 69-годишниот лидер ќе биде потврден за генерален секретар на партијата до крајот на конгресот, кој се одржува еднаш на секои пет години, и ќе ја зацврсти својата позиција како најмоќен кинески лидер од Мао Ѕетунг.
Речиси 2 300 делегати од сите кинески провинции ќе се соберат во недела во Големата сала на народот на плоштадот Тјенанмен во Пекинг, околу која мерките за безбедност се значително зголемени.
Конгресот ќе се одржи под строги здравствени мерки бидејќи Си продолжува да инсистира на спроведување на политиката на нулта толеранција кон коронавирусот.
На конгресот, кој ќе се одвива претежно зад затворени врати, учесниците ќе изберат околу 200 члена на Централниот комитет на партијата, кој потоа избира 25 члена на Политбирото и на семоќниот Постојан комитет, највисокото раководно тело во државата.
„Но, всушност, сè е однапред договорено бидејќи конгресот не се одржува додека сите фракции не се договорат“,
изјави синологот Жан-Филип Беја.
Си Ѓинпинг моментално има три врвни позиции: како генерален секретар на партијата, тој е шеф на кинеската Комунистичка партија; како претседател на Кина, тој е шеф на кинеската држава; како претседател на Централната воена комисија на Кина, тој командува со вооружените сили. Го нарекуваат и врховен лидер.
На конгресот, кој се одржува на секои пет години, Си најверојатно ќе ги задржи првите две титули, генерален секретар на партијата и претседател на Централната воена комисија, додека најверојатно ќе добие нов претседателски мандат на годишната седница на Националниот народен конгрес во пролетта 2023 година.