Од следната недела, посочи тој, ќе треба да почнат со работа и пунктови за тестирање во рамки на Здравствениот дом во Скопје за да се опфатат поголем број граѓани со оглед на тоа што веќе има локална трансмисија во градот
Ова е благ почеток, точно е дека пациентите се во пораст и тоа е очекувано, но откривањето на коронавирусот во рана фаза и асимптоматските случаи, како и можноста за домашно лекување даваат надеж дека нема да се случи нешто драматично, смета министерот за здавство Венко Филипче.
Одговарајќи на новинарски прашања, тој оцени дека властите добро го амортизирале првичниот удар од коронавирусот во земјава.
„Ние сме спремни и дополнително ги заоструваме мерките заради тоа што само со целосна контрола можеме да го постигнеме тоа што го сакаме. Ние во оваа ситуација имаме приближно 24 заболени на милион жители, Шпанија има 350. На нив им се заканува тоа што се случи во Италија. Тоа нас ни укажува дека сме добро организирани, дека добро го амортизиравме првичниот удар. Искрено се надевам дека вака блага ќе биде кривата на пораст на бројот на пациенти, дека тоа ќе биде постепено дека здравствениот систем тоа ќе може да го организира“,
рече Филипче, потенцирајќи дека паралелно ќе водат и енергична борба против лажните вести за да не се нарушува довербата на граѓаните и да не се создава паника.
Зборувајќи за капацитетите кои ги имаат здравствените институции, министерот рече дека на Клиниката за инфективни болести има вкупно 110 кревети, а во моментов не се искористите ниту 25 проценти од капацитети.
Тој денеска најави дека заразените или сомнителните пациенти кои имаат потреба и од друга лекарска интеренција ќе се носат во градската болницата „8-ми септевмри“ во Скопје, но ако има потреба и се пополнат капацитетите на Инфективна клиника, „8-ми септември“ ќе биде следната локација каде ќе се сместуваат и останатите новозаразени.
Тој уште еднаш го спомена скринингот посочувајќи дека целта е да се стигне до сите првични контакти кои ги имале веќе заразените, зошто токму тие се луѓето кои се во најголем ризик да се веќе заразени и да го шират вирусот. Со таков скрининг викендов, како што најавија здравствените власти и претходно, ќе се почне во Струга бидејќи тамошното население имало најмногу интензивни контакти со жителите на Дебар, а од наредната недела се очекуваат планови и за други места.
Од следната недела, посочи тој, ќе треба да почнат со работа и пунктови за тестирање во рамки на Здравствениот дом во Скопје за да се опфатат поголем број граѓани со оглед на тоа што веќе има локална трансмисија во градот.
*Поврзани вести:
Филипче: Сите пациенти се стабилни, во моментов се тестираат 35 лица