Изготвување протоколи за работа за сите дејности, овозможување побрз проток на границите и задржување на постојните или склучување нови договори за извозно ориентираните компании и финансиски пообемна поддршка со претстојниот четврти пакет економски мерки, побара денеска Сојузот на стопански комори (ССК) од Владата, на средбата со министерот за економија Крешник Бектеши.
Претседателката на ССК, Данела Арсовска, смета дека е неопходно државата да помогне за бизнисот да преживее, посебно фирмите кои во претходните години вложуваа многу бидејќи состојбата е влошена, а компаниите секојдневно запаѓаат во долгови.
Бектеши рече дека максимално ќе им се излезе во пресрет на компаниите и веќе се прават проценки преку ребалансот на Буџетот да се обезбедат средства за четвртиот пакет антикризни мерки.
Кога ќе биде ребалансот, ќе се знае следната недела.
Ова вчера го најави и вицепремиерот за економски прашања, Фатмир Битиќи.