Битиќи реагира на Фејсбук дека ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на автоосигурувањето на грбот на граѓаните
Вицепремиерот за економски прашања Фатмир Битиќи вели дека е згрозен од зголемувањето на сумата за задолжителна осигурителна полиса од страна на осигурителните компании. Според него, ваквата одлука може да се толкува како директен атак или политичко мешање на компаниите за осигурување бидејќи тарифникот со тие зголемувања двапати бил доставен до Владата и двапати не бил одобрен на владина седница.
Битиќи реагира на Фејсбук дека ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на автоосигурувањето на грбот на граѓаните.
Тој ги повика министерството за финансии и комисијата за заштита на конкуренција да покренат постапка.
„Ова е пример за длабоката држава која мора да се искорени. Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“,
порача Битиќи на Фејсбук.
Како што веќе објавивме, од вчера цените на осигурителните полиси за автомобилите се повисоки за 15 отсто со што поскапува регистрацијата на возилата. Овие цени се однесуваат на автомобили со моќност над 44 киловати (КВ) и за товарните возила. Премијата за осигурување за возилата со моќност до 44 киловати останува иста.
Според новиот ценовник, сопствениците на возила со моќност од 44 до 55 КВ, наместо досегашните 5 453 денари, отсега ќе плаќаат 6 292 денари. Оние со возила со мотор од 55 до 65 КВ, наместо 6 166 денари треба да платат 7 116 денари, за возилата со мотор од 66 до 84 КВ наместо досегашните 7 133 денари цената за осигурителна полиса сега изнесува 8 233 денари, а од 8 510 денари на 9 821 денари е поскапено осигурувањето за возилата со мотор од 84 до 110 КВ. Осигурувањето за возилата со мотор над 110 КВ сега ќе биде 11 879 денари, наместо досегашните 10 294 денари.
Информацијата за покачување на цените осигурителните компании ја добиле во понеделникот од Националното биро за осигурување. Во информацијата било наведено дека новите цени треба да се применуваат од четврток (25 април).
Зголемувањето на цената на полисите за задолжително автомобилско осигурување, од Агенцијата за супервизија на осигурување (АСО) го оценија како неоправдан чекор на осигурителните компании.