На дводневниот состанок на иницијативата, како што посочи Битиќи, ќе се зборува и за заедничко надминување на енергетската криза и начините за штедење, оти тоа, како што кажа, не само што е неопходно, туку е и единствено одговорно и солидарно однесување на секој од нас
Вицепремиерот за економски прашања, Фатмир Битиќи денеска во Тирана ја отвори пленарната седница на меѓувладините работни групи кои денеска и утре ќе дискутираат за детална имплементација на постигнатите договори во рамките на иницијативата „Отворен Балкан“, а во насока на утврдување на рамките за помош при катастрофи и несреќи, недостаток на храна и при енергетска криза.
Во воведното отворање, Битиќи рече оти е време да се фокусираме на резултати кои произлегуваат од реалните потреби на граѓаните, а во таа насока истакна дека иницијативата „Отврен Балкан“ има полн капацитет да одговори на потребите и да даде оперативни решенија.
„Иако секоја национална економија има свои соодветни одговори на предизвиците со кои се соочуваме, како онаа од претходната недела кога Северна Македонија воведе забрана за извоз на пченица – но, доколку оперативниот план што тука заедно ќе го работиме со колегите од Албанија и Србија покаже дека можеме и треба да помогнеме со количина на пченица за нашите сојузници од Отворен Балкан, ќе најдеме начин тоа да го направиме, како и можни начини за заеднички настап на глобалниот пазар како поголем регион или како цела Унија со земјите кандидатки“,
истакна Битиќи.
Вицепремиерот посочи дека унапредувањето на трговската размена и синџирите на снабдување се потенцијал од кој сите можеме да капитализираме преку стимулирање на носење на синџирите на набавка во нашите земји и блиску до границите на Европската Унија, сега кога последните три години, ни покажаа дека далечните источни маркети не се одржливи и се лесно кршливи во време на криза.
„Секое лето успешно или за жал помалку успешно се справуваме со летните пожари. Ќе изработиме планови и ќе создадеме оперативни групи за да одговориме едни кон други итно кога на некоја од нашите држави и е потребна помош, но сигурен сум дека ќе дефинираме и можности за помош на останатите земји од регионот – гледаме што се случува деновиве во Словенија. Подготвени сме да помогнеме секому, потребата од помош нема граници“,
посочи Битиќи.
Тој додаде оти на иницијативата ќе се зборува и за заедничко надминување на енергетската криза и начините за штедење, оти тоа, како што кажа, не само што е неопходно, туку е и единствено одговорно и солидарно однесување на секој од нас.
„За крај, она што верувам дека граѓаните го очекуваат, а тоа е дефинирање и начинот на активирање на идентификацискиот број за граѓаните и потребата за отстранување на работните дозволи. Секој ден поминат во бирократија е пропуштена шанса“,
заклучи вицепремиерот.
Во своето обраќање, Битиќи посочи дека ова ова ќе бидат темите за кои денеска и утре ќе разговараат пет работни групи, а на крајот на утрешниот ден ќе го презентираат сработеното.