Дополнително, изјави претседателот на РКЕ, со воведувањето на надомест за пристап до мрежа, овозможено е намалување на мрежарината за речиси 23 отсто
Цената на струјата за домаќинствата од 1 јануари се намалува за 5,16 отсто за првиот блок, за вториот блок и за евтината тарифа останува иста, за третиот блок поскапува за 2,88, а за четвртиот блок за 1,86 отсто, соопшти на денешната прес-конференција претседателот на Регулаторната комисија за енергетика, Марко Бислимоски.
Тој посочи дека ќе биде воведен и надомест за пристап до мрежа од 200 денари месечно. Доколку не се вовел овој надомест, нагласи Бислимоски, ќе имало поскапување на цената на електричната енергија за 3,4 отсто во првиот блок, за 8,62 во вториот, за 9,46 во третиот и за 4,92 отсто во четвртиот блок, додека цената на струјата во евтина тарифа ќе се зголемела за 15,42 отсто. Дополнително, изјави претседателот на РКЕ, со ваквиот потег, овозможено е намалување на мрежарината за речиси 23 отсто.
„Со новиот концепт, пристап кон мрежа, се направи фер распределба на трошокот за мрежа меѓу редовните корисници и оние потрошувачи кои повремено ги користат објектите. Сите потрошувачи, односно домаќинства ќе плаќаат 200 денари за пристап на мрежа. Дополнително потрошувачката на струја се намалува во земјата пред се поради поставувањето на фотоволтаици на домаќинства и компани. Не беше фер тој товар да го поднесат потрошувачите кои не поставиле фотоволтаици на своите кровови. Ова е правилен пристап според нашата институција“,
рече Бислимоски истакнувајќи дека одлуката е во насока на заштити стандардот на граѓаните.
Тој им порача на граѓаните да имаат доверба во РКЕ како институција бидејќи, како што рече, Комисијата ги носи одлуките врз основа на знаење.
Според Бислимовски, новата цена за струјата е збир од цена за енергија, плус збир и плус мрежарина.