Во случајот, како што се наведува во соопштението на Финансиската полиција, покани биле испратени само до одредени економски оператори (фирми), кои од добиениот ангажман инкасирале по 9 440 000 денари (околу 154 000 евра) секоја или 47 200 000 денари (околу 768 000 евра) вкупно
Поранешен помошник-министер во Министерството за внатрешни работи (МВР) и началничка на Секторот за набавки, менаџмент и логистика се осомничени дека ја злоупотребиле службената положба и овластување во врска со ангажирање фирми за сервисирање службени возила на МВР.
Од Управата за финансиска полиција денеска соопштија до Основното јавно обвинителство за гонење организиран криминал и корупција (ОЈО ГОКК) поднела кривична пријава против помошник-министер во МВР со иницијали Ж.Т. и против А.С., раководителка на Секторот за набавки, менаџмент и логистика, поради основано сомнение дека сториле кривично дело злоупотреба на службената положба и овластување од член 353 став 4 од Кривичниот законик.
Делото за кое се осомничени го сториле во 2018 година, односно 2019 година. Според Финансиската полиција, тогашниот помошник-министер наместо да спроведе редовна постапка за избор на фирми за поправка и сервисирање на возила на Министерството, преку распишување тендер, донел одлука набавката да се изврши преку итна постапка, без објавување оглас.
Во случајот, како што се наведува во соопштението на Финансиската полиција, покани биле испратени само до одредени економски оператори (фирми), кои од добиениот ангажман инкасирале по 9 440 000 денари (околу 154 000 евра) секоја или 47 200 000 денари (околу 768 000 евра) вкупно.
„Тој не презел дејствија за навремено отпочнување и објавување редовна постапка и ја загрозил безбедноста на вработените во Министерството за внатрешни работи со што ги довел возилата во состојба на дефектажа и неможност да се сервисираат на начин што не донел одлука во најбрз можен рок по носење на новиот Годишен план за јавни набавки за 2019 година и со тоа свесно ги довел сите во состојба на итност за со намера да се спроведе итна постапка донесувајќи Одлука за спроведување на итна постапка со преговарање без објавување на оглас за поправка и сервисирање на ПМВ и ТМВ во која постапка биле испратени покани само до одредени економски оператори“,
се вели во соопштението на Управата финансиска полиција.
Според соопштението, пријавениот поранешен функционер во МВР свесно и со однапред утврдена намера не донел одлука за јавна набавка од отворена постапка за сервисирање на возилата на МВР, иако тоа требало тоа да го стори во декември 2018 година, како што било предвидено со дополнувањето на годишниот план на МВР за таа година.
Тогашната началничка на Секторот за набавки, менаџмент и логистика на Министерството за внатрешни работи, А.С., пак, е опфатена во кривичната пријава затоа што не задолжила лице за објавување оглас за јавна набавка и со тоа не овозможила други заинтересирани фирми да учествуваат во постапката.
„Врз основа на што првопријавениот Ж. Т. склучил рамковна спогодба по итна постапка со преговарање без објавување оглас, на кој начин првопријавениот заедно со второпријавената овозможиле противправна имотна корист за носителите на набавката ‘Коп Компани ДООЕЛ Скопје’, ‘Пржо Автокомплекс ДООЕЛ Битола’, ‘Аутомакедонија АД Скопје’, ‘ДТУ Авто сервис Раде ДООЕЛ увоз-извоз с. Теарце Тетово’ и ‘МИ – ДА Гранд Моторс ДОО Скопје’, по 9 440 000 денари поединечно за секој правен субјект, односно вкупен износ од 47 200 000 денари со ДДВ“,
се наведува во соопштението од Управата за финансиска полиција.