Вицепремиерот задолжен за економски прашања, координација на економските ресори и инвестиции, Фатмир Битиќи, учествува на втората конференција за глобално програмирање на Зелениот климатски фонд, која ќе се одржува од денеска до 15 септември во Инчеон, Република Кореја, на која денеска имал свое обраќање
Заедно со земјите од Западен Балкан сме посветени да работиме кон целите за јаглеродно неутрален континент до 2050 година, преку инкорпорирање строга климатска политика и реформирање на енергетскиот и транспортниот сектор, истакнал вицепремиерот задолжен за економски прашања, координација на економските ресори и инвестиции, Фатмир Битиќи, во своето обраќање на отворањето на втората конференција за глобално програмирање на Зелениот климатски фонд, која ќе се одржува од денеска до 15 септември во Инчеон, Република Кореја.
Во врска со оваа цел, Битиќи навел дел од активностите што се преземаат во оваа насока.
„Да се стремиме кон намалување и постепено укинување на јагленот и промовирање на декарбонизацијата во регионот, зголемување на можностите за решенија за ублажување и приспособување кон климатските промени, поддршка на шеми за реновирање на приватни и јавни згради, обезбедување соодветно финансирање и зголемување на уделот на обновливите извори на енергија, поддршка за развој на паметна инфраструктура, промовирање на поттикнување на иновативни технологии и зајакнување на меѓурегионалната соработка како што е прикажано со иницијативата Зелени патеки/коридори“,
посочил Битиќи додавајќи дека сите овие преземени и планирани акции носат со себе предизвици, но во исто време и можност за зелен раст, можност за создавање зелени работни места и позелена планета.
Вицепремиерот се заблагодарил за соработката со Зелениот климатски фонд како најголем фонд кој се занимава со климатски промени на глобално ниво и навел неколку активности за активности за следење и рационализирање на климатските финансии, кои се пилотирани и предложени како среднорочно решение, сè додека не се обезбедат средства за клима во националните буџети.
„Веќе почнавме да работиме на создавање на поволна средина за вклучување на приватниот сектор во климатските инвестиции врз основа на приоритетните сектори во земјата. За да го поттикнеме токму ова, го започнавме процесот на акредитација на Фондот за иновации и технолошки развој (ФИТР), да биде првиот национален ентитет акредитиран од ЗКФ, преку кој ќе создадеме поголеми можности за развој и имплементација на проекти поврзани со климата и во исто време и ЗКФ финансирани проекти“,
истакнал Битиќи.
Во овој контекст тој ги споменал проектите „Зелени градови“, „Финансиски инструмент за опрема за ладење“, во рамките на кој ќе се формира Национален фонд за енергетска ефикасност и „Глобален субнационален климатски фонд“ за Техничка помош и капитал, кои се поддржани од Зелениот климатски фонд.
„Ова обраќање сакам да го завршам со новиот концепт што треба да се развие за заеднички да успееме – Треба да го напуштиме воспоставениот концепт на зависности и да се префрлиме во нова ера каде меѓузависноста ќе биде нашиот пат напред, и тоа ќе ја катализира климата на иновации: со инвестирање во нови технологии, деловни модели и практики“,
заклучил Битиќи.