Бесими на состанок со претставници на ММФ: Приоритет е ублажување на последиците од ковид-кризата

Новиот министер за финансии, посочувајќи дека евроатлантските интеграции влијаат како катализатор на растот, очекува во следните години просечниот раст да се удвои, што би значело дека во најуспешните години може да се надмине психолошката граница за раст над четири проценти

Кризата предизвикана од ковид-19 и нејзиното влијание врз македонската економија, преземените пакет мерки и новиот пакет што се подготвува во соработка со сите чинители во економијата, како и во консултации со меѓународните финансиски институции, беа тема на разговор на првата официјална средба што се одржа онлајн, на новиот министер за финансии Фатмир Бесими со Бергјот Бјорнсон Баркбу, шеф на мисијата на Меѓународниот монетарен фонд за Северна Македонија и Штефани Ебле, регионален резидентен претставник за земјите од Западен Балкан.

Бесими, како што е соопштено, истакнал дека главен приоритет ќе биде ублажувањето на ефектите од ковид-кризата и обезбедување солидна основа за заздравување на економијата, а притоа зачувување на макроекономската стабилност.

Бесими: Ќе има доволно пари во буџетот и за евентуален втор шок од кризата

Најавил дека ќе се следи работата на институциите и реализацијата на планираните проекти за конкретната година и во согласност со тоа ќе се утврдува колку средства ќе им се доделуваат наредната година.  Фокусот, како што рекол, ќе биде ставен на привлекување финансиски средства во нашата економија од надворешни извори на финансирање, како и разгледување можности за мобилизирање на слободните средства од домашниот пазар.

„Министерот потенцира дека, доколку успешно се спроведат политиките – поддржани и со евроатлантските интеграции кои влијаат како катализатор на растот, очекува во следните години просечниот раст да се удвои, што би значело дека во најуспешните години може да се надмине психолошката граница за раст над четири проценти“,

се наведува во соопштението од Министерството за финансии.

Од ММФ истакнале дека постојано ја следат состојбата во македонската економија и дека ќе продолжат да нѐ поддржуваат во рамките на своите можности, како што претходно помогнаа со инструментот за брзо финансирање од 176,5 милиони евра.