Потпретседателот на Беса, Кастриот Реџепи, смета дека коалицирањето со СДСМ ќе им донесе повеќе мандати и на двете партии
Мали се шансите кон коалицијата на СДСМ и Беса да се приклучат и Алијансата за Албанците и Алтернатива – двете партии кои неодамна исто така постигнаа договор за заеднички настап на парламентарните избори. Тоа е оценката на Kастриот Реџепти, потпретседателот на Беса, кој во гостување во „Утрински брифинг“ вели дека проценките се дека коaлицирањето со СДСМ ќе им донесе повеќе мандати и на двете партии.
„Ние секогаш се залагавме за коалиција која ќе донесе промена, да донесе максимализација на потенцијалот на нашите поддржувачи. Што се однесува до можноста за приклучување на други партии, сметам дека тие треба да одговорат. Мислам дека, со оглед како се позиционирани, тешко дека ќе има предизборна коалиција“
вели Реџепи.
Тој посочува дека во оваа фаза се дефинираат програмските принципи на првата коалиција на СДСМ со партија од албанскиот блок.
„Во првата фаза нас нè интересира да ги дефинираме принципите и програмските определби, а најнезначаен дел се позициите на пратеничките листи. Во моментов сè уште се синхронизира програмата и мислам дека кон крајов на неделава ќе има и конкретни работи околу позиционирањето. Но мислам дека во секој случај ќе имаме многу повеќе мандати отколку во некоја друга комбинација“,
вели Реџепи.
Претседателот на Алијансата за Албанците, Зијадин Села, ја нарече деновиве коалицијата на СДСМ и Беса политичка авантура, која не им оди прилог на Албанците и на решавањето на нивните проблеми. Албанскиот глас, според него, треба да оди кај албанските партии.
Ставот на досегашните партнери на СДСМ – ДУИ, е исто така во насока на тоа дека коалицијата СДСМ-Беса значи дефакторизација на албанскиот глас, додека социјалдемократите се надеваат дека овој предизборен сојуз ќе им донесе над 61 мандат, како брана од евентуални уцени и условувања при формирањето на идната влада и при проширувањето на владејачката коалиција.