Поранешниот албански претседател и премиер Сали Бериша, се јави со реакција по одлуката на САД да го прогласат за непожелна личност.
Преку реакција на Фејсбук, Бериша се обраќа директно до државниот секретар на САД, Ентони Блинкен, и вели дека за одлуката бил информиран од медиумите и додава дека во текот на 30 години во политиката немало обвинение против него, од кое било лице, ниту од некоја локална или странска институција за злоупотреба на средства и каков било друг облик на корупција.
Тој наведува дека членовите на неговото семејство никогаш немале корист од јавни фондови и средства и никогаш не биле обвинети од албанското или правосудството на која било друга земја.
Бериша побара од Бликен да ги објави јавно сите факти и документи со кои располага американската администрација или кој било во светот за да го аргументирале своето тврдење.
„Никогаш не сум тврдел дека сум непогрешлив,но ви гарантирам дека се чувствувам горд на сите мои ставови и ве уверувам дека тие биле и ќе бидат мотивирани само од јавниот и националниот интерес на албанската нација и вистината, кои, ги бранев на ист начин како и денес и во времето кога младите Албанци беа погубени на границата за остварување на нивниот американски сон. Искрено Сали Бериша“,
пишува во реакцијата на Фејсбук.
Претходно, Блинкен го прогласи Бериша за неподобен за влез во САД и како причини за тоа вели дека се коруптивни постапки на Бериша и поткопување на демократијата во Албанија. Покрај Бериша, за неподобни се прогласени и членовите на неговото потесно семејство.
„Коруптивните постапки на поранешниот претседател на Албанија, Сали Бериша, ја поткопаа демократијата во Албанија. Јавно ги прогласувам Бериша и членовите на неговото потесно семејство како неподобни за влез во САД. Ние остануваме обединети против корупција, со нашите партнери во Албанија“,
напиша Блинкен на Твитер.