Американскиот државен секретар објави дека го прогласува за персона нон грата поранешниот претседател и премиер на Албанија
Американскиот државен секретар Ентони Блинкен го прогласи за неподобен за влез во САД поранешниот премиер и претседател на Албанија, Сали Бериша, кој порано ја предводеше Демократската партија на Албанија.
Причини за тоа, како што наведе Блинкен, се коруптивни постапки на Бериша и поткопување на демократијата во Албанија. Покрај Бериша, за неподобни се прогласени и членовите на неговото потесно семејство.
„Коруптивните постапки на поранешниот претседател на Албанија Сали Бериша ја поткопаа демократијата во Албанија. Јавно ги прогласувам Бериша и членовите на неговото потесно семејство како неподобни за влез во САД. Ние остануваме обединети против корупција, со нашите партнери во Албанија“,
напиша Блинкен на Твитер.
Former President of Albania Sali Berisha’s corrupt acts undermined democracy in Albania. I am publicly designating Berisha and his immediate family members as ineligible for entry into the United States. We remain #UnitedAgainstCorruption with our partners in Albania.
— Secretary Antony Blinken (@SecBlinken) May 19, 2021
Во службената изјава што ја објави Блинкен се наведува дека особено како премиер на Албанија, Бериша бил
вклучен во коруптивни дела, како што се злоупотреба на јавни средства и мешање во јавни процеси, вклучително и користење на неговата моќ за своја корист и за богатење на неговите политички сојузници и членовите на неговото семејство, а на на сметка на довербата на албанската јавност во владините институции и јавните службеници.
„Понатаму, неговата реторика покажува дека тој е подготвен да се заштити себеси, членовите на неговото семејство и неговите политички сојузници на сметка на независните истраги, напорите за борба против корупцијата и мерките за одговорност. Од тој аспект, ја потврдувам потребата за отчетност и транспарентност во демократските институции во Албанија, владините процеси и во постапките на албанските јавни службеници“,
наведува Блинкен во службената изјава.