Доскорешната претседателка на Советот на општината посочува дека овој месец по вторпат се дискутирале измени на Деловникот, но овој пат со изоставување на сите елементи за граѓанска партиципативност
Јана Белчева Андреевска, советничка во Центар, која неодамна поднесе оставка од претседателка на Советот на оваа општина, во колумна во МКД.мк им забележува на колегите дека бегаат од дигитализација на работењето и од поголема транспарентност кон граѓаните.
„Иако прва почнува со онлајн-работење, а тоа е препознаено на различни нивоа, сепак е и прва која го напушта и се враќа на работење во сала за седници каде условите за одржување препорачана дистанца се невозможни. Се работи не за зафрлена општина која нема технички можности, туку за Центар, за онаа што треба да биде најпрогресивната и пример за другите помали дека промени на подобро се можни и остварливи“,
пишува Белчева.
Таа посочува дека овој месец по вторпат се дискутирале измени на Деловникот за работа на Советот, но овој пат со изоставување на сите елементи за граѓанска партиципативност. Потоа, Белчева посочува неколку точки што Советот не ги прифатил:
-јавни објави на предлог-одлуки пред нивно гласање на Совет, а со можност за стручно и граѓанско учество;
– јавна објава на записници, аудио и видео од седници, како и можност за пренос во живо;
– јавна објава на термини за одржување комисии, за да се отвори можност за учество на стручни лица, институции, организации…;
– дигитализација во работењето на Советот, со воведување целосна електронска комуникација, минимум употребата на хартија, оптимизирање на трошоците и позитивно влијание на животната средина.
„Неприфаќањето на овие измени во Деловникот на Општина Центар, предводено од новата претседателка Симоноска, е доказ за моменталната демократска (не)зрелост и неразбирање на начелата за добро владеење со вклучување на граѓаните. Нивото на Советот на Центар никако да порасне и да ги покаже демократските капацитети и зрелоста очекувана од страна на граѓаните“,
коментира Белчева.