Дополнителни контроли се очекуваат од 1 декември, кога ќе започне да се применува мерката за субвенционирање на електрична енергија за компаниите што произведуваат основни прехранбени производи, вели министерот за економија
Од 1 декември треба да ги видиме резултатите на пазарот од коригираните цени на основните прехранбени производи, а во следните четири месеци, додека трае кризната состојба, очекувам врз основа на постојани пресметки на трошоци од увозните цени на храна и субвенционирани цени на електричната енергија, како и стабилизација на берзантските цени, кои веќе се во мирување да продолжи намалувањето на цените на основните прехранбени производи посебно на тие производи кои се наведени во одлуката на Владата. Ова го најави министерот за економија Крешник Бектеши на денешната прес-конференција.
Според него, некои од производителите на млеко и леб веќе се почнати на пазарот да имаат коригирани цени, што е за пофалба.
„Намалувањето за 10 отсто е реално согласно сите анализи што се направени од Министерството за економија и другите институции. Бидејќи кај поголемиот дел од овие производи се применува мерката за трговска маржа до 10 отсто, Државниот пазарен инспекторат ќе врши во континуитет контроли кон трговците на големо и мало за почитување на мерката при утврдување на цените. Дополнителни контроли се очекуваат од 1 декември, кога ќе започне да се применува мерката за субвенционирање на електрична енергија за компаниите што произведуваат основни прехранбени производи“,
најави Бектеши.
Министерот најави дека до крајот на овој месец се очекува на седница на Влада да се донесе акциски план за дополнителни мерки за поддршка на граѓаните и на мали и микрокомпании, посебно на оние компании што вработуваат поголем дел од граѓаните, а тие главно се мали потрошувачи на електрична енергија кои се на регулиран пазар.
Растот на цените на производите изминатиот период, Бектеши вели дека е во согласност со ценовните движења на прехранбените производи на меѓународниот пазар. Поточно, за повисоките цени на житните производи и суровото сончогледово масло, министерот вели дека се главно одраз на високиот раст на цените на овие производи на светските берзи при отежнато производство и увоз од Украина поради инвазијата од Русија.