Министерот за економија Крешник Бектеши на својот фејсбук-профил објави дека е лажна веста што ја објавија некои медиуми дека камиони со македонска пченица се извезуваат во Косово и дека државата има резерви за само 26 дена.
„Некои медиуми денеска објавија дека камиони со македонска пченица се извезуваат во Косово и дека имаме резерви за само 26 дена. Сакам да им порачам на сите вакви медиуми што шират лажни вести да се засрамат, посебно во ваква кризна ситуација во државата предизвикана од коронавирусот“,
напиша Бектеши на Фејсбук и притоа објави принтскрин од вест објавена на порталот „Инфомакс“.
Тој апелира до сите граѓани дека државата има доволно резерви на пченица и на брашно, а дополнително тоа е и одлуката за забрана за извоз во други земји, чие спроведување се контролира од инспекции на терен.
„Да потсетам, објавувањето на лажни вести согласно заклучок на Владата е казниво по закон. Апелирам до медиумите да не објавуваат лажни вести кои предизвикуваат паника кај граѓаните во оваа кризна ситуација“,
апелира Бектеши.