Првиот вицепремиер не даде одговор на дополнителното прашање дали тоа било предвидено во договорот што Владата го потпиша со „Бехтел и Енка“, а за кој денеска тој и неговите колеги министри посочија дека е класифициран бидејќи во него има клаузули за тајност
По осум дена од свечената церемонија за означување на почетокот на изградбата на Коридорот 8, конечно стигна одговор на прашањето кој платил за настанот.
Првиот вицепремиер Артан Груби, кој е координатор на проектот за изградба на коридорите 8 и 10-д, на денешниот брифинг со новинарите посочи дека свеченоста ја платил изведувачот, во случајот со американско-турскиот конзорциум „Бехтел и Енка“.
„Изведувачот плати“,
кратко рече Груби.
Тој не даде одговор на дополнителното прашање дали тоа било предвидено во договорот што Владата го потпиша со „Бехтел и Енка“, а за кој денеска тој и неговите колеги министри посочија дека е класифициран бидејќи во него има клаузули за тајност.
Свечената церемонија се одржа на 4 април на патарината кај Тетово. Бината беше дизајнирана така што симболизираше автопат, имаше видеоѕид, музика и многу обезбедувања.
Од возилата паркирани околу бината беше очигледно дека организацијата ѝ е доверена на „Арбериа дизајн“. Вицепремиерот Груби на денешниот брифинг не пропушти да додаде дека освен „Арберија дизајн“, настанот го организирал и „Биг саунд“.
Компанијата „Арбериа Дизајн“ лани во август ја организира прославата за годишнината од Рамковниот договор за 80 илјади евра. Јавната набавка ја спроведе Министерството за политички систем и односи меѓу заедниците, со кое раководи токму Груби. Истата компанија лани ја организира и прославата за Денот на албанската азбука за речиси 60 илјади евра и е еден од најчестите добавувачи на Министерството за образование, пред сè, во печатењето книги и друг училиштен материјал.
„360 степени“ се обиде да добие одговори на прашања во врска со организацијата на свеченоста преку владината прес-служба, но оттаму една недела не одговорија.
На самото место на настанот на 4 април, пак, кога Груби се појави во маица со знакот на Коридорот 8 го прашавме дали и неа му ја испечатиле „Арбериа дизајн“, но наместо одговор првиот вицепремиер ја соблече маицата.
„Дајте, радувајте се, ве молам, радувајте се, се гради во државава, сите ќе имаат работа, ќе биде добро за цело општество, за сите граѓани, мислам дека маичката можам и да ви ја подарам“,
ни рече тогаш Груби.
Новинарите се обидоа одговор за организацијата на настанот да добијат и од премиерот Димитар Ковачевски, но рече дека во тој период не бил во земјава и ги упати медиумите одговори да бараат од Груби.
Настанот на 4 април беше најавен како поставување камен-темелник, но такво нешто не можеше да се види. Наместо тоа, имаше откривање на табла.
За Коридорот 10-д, пак, исто така, се предвидува сличен настан кој е закажан за 12 мај.