Триесет и шест годишниот виничанец и неговата партнерка со хрватско државјанство, кои вчера доцна попладнето избегаа од штипското Инфективно одделение додека се вршела анализа дали мажот има позитивен или негативен тест на коронавирус, денеска по препорака на санитарниот инспектор ќе бидат пуштени на домашно лекување, бидејќи тестот покажал дека не е заразен од овој вирус, објави на прес-конференција директорот на Клиничка болница-Штип, Ален Ѓеорѓијев.
Тој ги потврди информациите од медиумите за целиот настан – дека виничанецот и неговата партнерка околу 14 часот биле донесени на Инфективното одделение во придружба на епидемиолог од Виница, откако мажот се пожалил на покачена температура. Бидејќи рекол дека престојувал во Северна Италија, двајцата веднаш биле сместени на Инфективното одделение.
Додека ги чекале резултатите во болничката соба на долниот кат на Инфективното одделение, виничанецот успеал да го извади горниот дел од вратата и оттаму побегнале со партнерката. Ѓеорѓијев вели дека се пронајдени во домот на виничанецот, а по неколку часа се вратени на Инфективното одделение во придружба на полицијата. Двајцата се сместени во изолациска соба на вториот кат од Инфективното одделение, а за неколку часа ќе ја напуштат по препорака на државниот санитарен инспектор. Пациентот вчера агресивно се однесувал кон медицинскиот персонал.
Освен овие двајца пациенти, на одделението во штипската болница нема други ниту во собите ниту во карантинскиот дел. Во меѓувреме, обезбедена е и заштитната опрема за штипските инфектолози и медицински сестри.
Поврзани вести
Неофицијално: И возачот на комбето и избеганиот виничанец се негативни на тестот за коронавирус
Пациентката што утрово се јави на Инфективна нема коронавирус