На Универзитетската клиника за гинекологија и акушерство во Скопје се роди бебе со породување кое се случува еднаш во 80 илјади породувања. Станува збор за редок феномен – бебе во „воден превез“, објави порталот Педијатар.
Бебето на свет дојде завчера со помош на д-р Елена Ѓоргиевска – Николовска, родено е со царски рез, а мајката носела близнаци.
„Како гинеколог-акушер со 18 годишно работно искуство на Клиниката имавме прилика заедно со мојата колешка д-р Катерина Николоска да породиме пациентка со термин со близначка бременост со царски рез, при што, по породувањето на првото бебе започна породувањето на второто бебе со „воден превез“. Целата екипа во операционата сала во еден момент беше благопријатно изненадена од овој природен феномен и покрај големиот број породувања кои ги правиме секојневно. Навистина тогаш сваќаме колку е совршена природата и како ги создала совршено сите работи“,
раскажува Ѓоргиевска – Николовска.
ШТО ЗНАЧИ БЕБЕ ВО „ВОДЕН ПРЕВЕЗ“ И ЗА КАКОВ ФЕНОМЕН СТАНУВА ЗБОР?
Докторката објаснува дека во текот на бременоста бебето е сместено во матката на мајката во обвивка која се нарекува околуплодова или амнионска обвивка, исполнета со течност, која го штити од бактерии и вируси од надворешната средина во текот на неговиот развој.
„Породувањето понекогаш може да почне со прскање на околуплодовите обвивки и да истече околуплодовата вода или тие да се прскаат јатрогено за да се забрза и олесни породувањето. Во текот на породувањето многу ретко се случува околуплодовата обвивка да не прсне и бебето да се роди заедно со обвивката во околуплодовата вода во т.н. „воден превез“, целосно како што било и внатре во матката. Тоа се случува во едно од 80 илјади раѓања. Многу ретко се случува при царски рез бидејќи околуплодовите обвивки мора да прснат за да се породи плодот, а скоро никогаш не се случува при спонтано вагинално раѓање“,
вели таа.
Како исклучително редок феномен во природата, луѓето отсекогаш му придавале мистични значења на раѓањето во „воден превез“. Некои култури веруваат дека ваквото раѓање е спиритуално, па дури и магично. Насекаде во светот се верува дека раѓањето во обвивките им носи среќа и на бебето и на целото семејство. Во многу култури се верува дека бебињата родени во обвивки се родени за големи животни достигнувања.
ШТО СЕ СЛУЧУВА ПО ПОРОДУВАЊЕТО?
По породувањето се прскаат обвивките и се слуша најубавиот звук – првиот плач на бебето.