Лимитот за цивилна одговорност во Северна Македонија достигнува до 600 000 евра, а во Бугарија како членка на ЕУ достигнува и до 5,2 милиони евра и затоа, според адвокатот Димитров, кога се поднесуваат барањата ќе биде направено да се искористат бугарските услови, кои се дел од европските и да бидат обесштетени сите настрадани
Барањата за отштета во автобуската несреќа на „Беса транс“, која минатата година се случи во Бугарија, се над 750 илјади евра, изјави за МИА адвокатот на дел од семејствата на загинатите и повредени патници Николај Димитров.
Тоа, како што посочи тој, е во согласност со лимитот на осигурителна одговорност и судската практика во Бугарија и додаде дека целата процедура е во многу напредна фаза.
Според него, тужбите ќе бидат поднесени во рок од неколку дена и ќе се бара заедничко разгледување на бугарската Агенција за патна инфраструктура и на претставникот на македонска осигурителна компанија „Граве“, кои во Бугарија се претставени од Националното биро на бугарските осигурителни компании за автомобили.
Вештото лице на увидот на местото на несреќата ја оценуваше состојбата на патната инфраструктура, површината на коловозот, знаците, ознаките и сите други елементи кои можат да дадат одговор на прашањето како точно се случила несреќата. Адвокатот за МИА прогнозира дека експертизата ќе биде готова за неколку месеци.
Поради фактот дека несреќата се случила на територија на членка на ЕУ, законски наследници на загинатите македонски граѓани можат да ги искористат лимитите за осигурување во земји-членки на ЕУ, каде што тие се до 12 пати поголеми.
Лимитот за цивилна одговорност во Северна Македонија достигнува до 600 000 евра, а во Бугарија како членка на ЕУ достигнува и до 5,2 милиони евра и затоа, според адвокатот Димитров, кога се поднесуваат барањата ќе биде направено да се искористат бугарските услови, кои се дел од европските и да бидат обесштетени сите настрадани.
Ако се докаже вината на Агенцијата за патна инфраструктура на Бугарија, таму нема лимит на одговорност.
Димитров исто така рече дека багажот на загинатите македонски граѓани за време на катастрофата е веќе вратен, но се утврдени некои предмети што недостигаат кај еден од неговите клиенти. Тој кажал дека жена му која загинала заедно со нивното дете за време на несреќата имала накит, кој потоа недостигал.
Инаку денеска, како што изјави адвокатот Николај Димитров, започнат е увид на дел од автопатот каде што се случи автобуската несреќа на „Беса транс“, чија цел е да покаже дали има причинско-последични околности кои довеле до несреќата.
Во декември истрагата покажа дека главна причина за настанатата катастрофа била брзината која не соодветствувала со условите на патот.