„Џонсон и Џонсон“ е третата вакцина одобрена од американските регулаторни тела, а за разлика од „Фајзер“ и „Модерна“ таа се дава во една доза
Иако ги славиме ваквите вести, ги повикувам Американците да продолжат да ги мијат рацете, да држат физичка дистанца и да носат маски, порача американскиот претседател Џо Бајден откако САД ја одобрија за употреба и третата вакцина против ковид-19.
Тој оцени дека тоа се охрабрувачки вести, но и предупреди дека борбата е далеку од завршена.
„Како што реков многу пати досега, сè уште постои голема веројатност состојбата да се влоши повторно со ширењето на новите мутации на вирусот и покрај моменталните подобрувања повторно да се врати лошата состојба“,
изјави Бајден.
Пораката тој ја испрати откако американските регулаторни тела, Агенцијата за храна и лекови (ФДА) ја одобри вакцината „Џонсон и Џонсон“, развиена од белгиската компанија „Јансен“. Ова е трета вакцина одобрена во САД по оние на „Фајзер“ и „Модерна“. Разликата е што наместо две дози, „Џонсон и Џонсон“ се дава во една доза и таа не бара специјални услови за чување односно наместо во замрзнувач може да се чува во фрижидер.
До крајот на јуни САД очекуваат да добијат 100 милиони дози од „Џонсон и Џонсон“, а првите дози се очекува да бидат испорачани веќе следната недела.
Оваа вакцина е клинички тестирана на повеќе од 44 000 луѓе во САД, Јужна Америка и Латинска Америка. На глобално ниво, покажа ефикасност од 66 проценти во спречување на умерени и тешки форми на ковид. Кога станува збор за тестовите направени во САД, ефикасноста е 72 проценти, а 85 проценти е ефикасни против развој на тежок облик на болеста.