Советниците за вакцини во Американската агенција за храна и лекови (ФДА) вчера ја одобрија употребата на вакцината на „Џонсон и Џонсон“ против коронавирусот, јави Си-Ен-Ен.
ФДА и Комитетот за биолошки производи јавно гласаа за одобрување на вакцината за итни случаи за лица постари од 18 години.
Вакцината на „Џонсон и Џонсон“ се разликува од „Модерна“ и „Фајзер“ по тоа што содржи само една доза и може да се чува во обични фрижидери, односно не бара екстремно ниски температури.
Вакцината, направена од подружницата Јансен, е клинички тестирана на повеќе од 44 000 луѓе во САД, Јужна Америка и Латинска Америка. На глобално ниво, покажа ефикасност од 66 проценти во спречување на умерени и тешки форми на ковид. Кога станува збор за тестовите направени во САД, ефикасноста е 72 проценти, а 85 проценти е ефикасни против развој на тежок облик на болеста.
Никој кој примил вакцина за време на тестот не починал, додава Си-Ен-Ен, и се очекува американските граѓани да почнат да добиваат дози на вакцината на „Џонсон и Џонсон“ веќе од следниот понеделник.
Вакцината користи аденовирус тип 26 за да инјектира коронавирусни протеини во клетките на телото и да предизвика имунолошки одговор.
САД имаат договор за купување на 100 милиони дози од оваа вакцина за милијарда долари, со можност за набавка на уште 200 милиони дози.
Компанијата „Џонсон и Џонсон“ соопшти дека е подготвена да достави вакцини веднаш по одобрувањето и планира да испорача една милијарда дози во 2021 година, кои би се произвеле во САД, Европа, Јужна Африка и Индија.