„Очекуваме утре да бидат ослободени уште заложници. И повеќе ден потоа, и повеќе ден потоа. Во текот на следните денови очекуваме дека десетици заложници ќе бидат вратени на нивните семејства“, рече претседателот на САД пред новинарите
Говорејќи за иднината, Бајден повика на ставање крај на „овој циклус на насилство“, повторувајќи ја својата решеност да се стреми кон решение за две држави „каде Израелците и Палестинците еден ден ќе можат да живеат рамо до рамо…со еднакво ниво на слобода и достоинство“
Американскиот претседател Џо Бајден вечерва во обраќање по повод ослободувањето на дел од заложниците што ги држи Хамас, како дел од договорот со Израел за четиридневен прекин на огнот, рече дека станува збор за почеток на процесот, кој досега се одвива добро, пренесува „Гардијан“.
Тој истакна дека заложниците кои се ослободени денеска поминале низ ужасни искушенија и дека ова е почеток на долго патување на зацелување на раните.
Денешниот ден, посочи тој, е резултат на „многу напорна работа и недели на личен ангажман“, додавајќи дека тој и неговите тимови работеле „деноноќно“ за да обезбедат ослободување на заложниците, уште од првиот ден кога тие биле заробени.
Америнаскиот претседател рече дека постојано бил во контакт со емирот на Катар, со претседателот на Египет и со израелскиот премиер Бенјамин Нетанјаху „за да ги потврди елементите на ангажманот“.
Бајден истакна дека денешното ослободување на заложниците е само почеток на процесот.
„Очекуваме утре да бидат ослободени уште заложници. И повеќе ден потоа, и повеќе ден потоа. Во текот на следните денови очекуваме дека десетици заложници ќе бидат вратени на нивните семејства“,
рече американскиот претседател пред новинарите.
Тој рече оти „нема да запре“ додека сите преостанати заложници во Газа не се вратат дома.
На прашање од новинарите дали примирјето може да биде продолжено, американскиот претседател рече дека според него, постојат реални шанси за тоа.
„Моите очекувања и надеж се дека како што одиме напред, остатокот од арапскиот свет и регионот, исто така, вршат притисок врз сите страни да го забават ова, да го доведат до крај што побрзо“,
рече Бајден, одговарајќи на дополнително прашање за неговите очекувања, пренесе Ројтерс.
Претседателот на САД посочи и дека договорената пауза во борбите е „критична“ можност да се достави многу потребната храна, лекови, вода и гориво за цивилите во Газа.
„Не губиме ниту една минута“,
рече тој, додавајќи дека е фокусиран на забрзување на испораката на хуманитарната помош во Газа во координација со Обединетите нации (ОН) и Црвениот крст.
Повеќе од 200 камиони со храна, лекови, гориво и гас за готвење денеска пристигнаа на преминот Рафах меѓу Египет и Газа, рече тој.
„Горивото ќе се користи не само за напојување на камионите што ги испорачуваат овие материјали за спасување на животи, туку и за десоленизација на бунарите за вода, за потребите на болниците и за пекарите. Стотици други камиони исто така се во позиција, подготвени да влезат во Газа во текот на следните денови“,
вели претседателот на САД.
Join me as I deliver remarks on the release of hostages being held by Hamas in Gaza. https://t.co/i1Hpl2jmG4
— President Biden (@POTUS) November 24, 2023
Во овој контекст, тој посочи дека се воспоставени механизми за да се спречат евентуални обиди на Хамас за пренасочување на помошта.
Говорејќи за иднината, Бајден повика на ставање крај на „овој циклус на насилство“, повторувајќи ја својата решеност да се стреми кон решение за две држави „каде Израелците и Палестинците еден ден ќе можат да живеат рамо до рамо…со еднакво ниво на слобода и достоинство“.
„Во текот на следните денови, ќе останам ангажиран со лидерите низ Блискиот Исток во заедничките напори да изградиме подобра иднина за регионот. Иднина во која вакво насилство е незамисливо. Иднина во која сите деца…Евреи, муслимани, христијани, Израелци, палестински Арапи ќе растат во мир“,
порача американскиот претседател во своето обраќање, пренесува „Гардијан“.
По ослободувањето на првата група заложници се огласи и шефот на Светската здравствена организација Тедрос Аданом Гебрејесус, кој на социјалната мрежа „Икс“ напиша дека станува збор за „добредојдена вест и огромно олеснување“.
Тој наведе оти се надева дека сите преостанати заложници наскоро ќе бидат ослободени и повторно ќе се обединат со своите најблиски.
„Додека се сè уште во заробеништво, тие мора да имаат пристап до каква било потребна медицинска нега“,
додаде Гебрејесус.
This is welcome news and an enormous relief. We hope all remaining hostages will be released soon and reunited with their loved ones. While still in captivity, they must have access to any medical care needed.
— Tedros Adhanom Ghebreyesus (@DrTedros) November 24, 2023
I am thinking of them and their families tonight.…
Ослободувањето на заложниците, меѓу другите светски државници и претставници на меѓународни организации, го поздрави и францускиот претседател Емануел Макрон.
„Го поздравувам ослободувањето на првата група заложници. Остануваме мобилизирани заедно со посредниците за да обезбедиме ослободување на сите заложници. Нашите мисли се со француските заложници и нивните семејства. Тие можат да сметаат на нашата одлучност“,
напиша Макрон на социјалната мрежа „Икс“.
I welcome the release of the first group of hostages. We remain mobilized alongside the mediators to secure the release of all hostages. Special thoughts go to the French hostages and their families. They can count on our determination.
— Emmanuel Macron (@EmmanuelMacron) November 24, 2023
Милитантите на Хамас денеска ја ослободија првата група од 13 израелски заложници согласно договорот за четиридневно примирје со Израел.
Покрај групата израелски државјани, меѓу ослободените заложници од Хамас се и 10 државјани на Тајланд и еден филипински државјанин.
Речиси истовремено со информациите за ослободувањето на израелските заложници, портпаролот на Министерството за надворешни работи на Катар, Маџид ал Ансари, соопшти дека од страна на Израел се ослободени 39 жени и деца кои беа држени во израелските затвори, со што страната ги исполнила своите обврски на првиот ден од четиридневното примирје, кое стапи во сила денеска наутро.