Во обраќањето од Кралскиот замок во Варшава по повод овонеделната годишнина од руската инвазија на Украина, американскиот претседател порача дека САД и европските држави не се обидуваат да ја контролираат или уништат Русија – нешто што претходно денеска го изјави рускиот претседател во своето обраќање до нацијата
Бајден порача и дека Украина никогаш нема да биде победена од Русија и никогаш нема да ја загуби поддршката од НАТО
Само неколку часа по говорот на рускиот претседател Владимир Путин во кој тој го обвини Западот за почетокот на конфликтот во Украина, американскиот претседател Џо Бајден во својот говор од Полска, пак, ги отфрли ваквите тврдења велејќи оти Путин ја започнал оваа војна.
Во обраќањето од Кралскиот замок во Варшава по повод овонеделната годишнина од руската инвазија на Украина, американскиот претседател порача дека САД и европските држави не се обидуваат да ја контролираат или уништат Русија – нешто што претходно денеска го изјави рускиот претседател во своето обраќање до нацијата.
„Оваа војна не е неопходност, туку трагедија. Претседателот Путин ја избра оваа војна. Украина мора да се брани додека Путин избира да ја продолжи војната“,
рече Бајден во своето обраќање од Полска, додавајќи дека рускиот претседател има избор да ја заврши војната кога и да одлучи.
Осврнувајќи се на почетокот на војната во Украина пред безмалку една година, американскиот претседател рече дека Путин мислел оти НАТО ќе се распадне и ќе се подели. Наместо тоа, рече Бајден, НАТО е пообединет од кога било.
„Путин мислеше дека ќе се предадеме, но погреши. Мислеше дека НАТО ќе се претвори во Финска, а наместо тоа се случи НАТОизацијата на Финска и Шведска. Путин веќе не се сомнева во нашето единство, но се сомнева во нашата истрајност. Но, нема сомнеж. Нашата поддршка за Украина нема да попушти и нема да се замориме поддржувајќи ја“,
нагласи Бајден.
Американскиот претседател порача дека Украина никогаш нема да биде победена од Русија.
Не само што по една година од војната Украина не е поразена туку, како што вели Бајден, таа е сè уште независна и слободна – од Херсон па сè до Киев.
„Пред една година, светот се подготвуваше за падот на Киев. Од посетата на Киев и можам да кажам дека Киев стои силен и што е најважно, стои слободно“,
рече американскиот претседател.
Не само Украина, туку сите демократски земји беа ставени на тест откако рускиот претседател Владимир Путин ја започна војната, кажа Бајден, и нагласи дека сојузниците стојат цврсто против руската агресија.
Завршувајќи го својот говор во Варшава, Бајден изрази благодарност до Полска, до украинските војници и до сите оние кои ја бранат слободата.
„Да одиме напред со вера и убедување и со постојана посветеност да бидеме сојузници, не на темнината, туку на светлината“,
рече претседателот на Соединетите Американски Држави.
На крајот од својот говор, Бајден на сцената беше пречекан од деца кои вееја украински, полски и американски знамиња.
Обраќањето на Бајден доаѓа откако Путин во својот денешен говор пред нацијата, меѓу другото, рече дека Русија го суспендира учеството во Договорот за намалување на стратегиското оружје (СТАРТ) со Соединетите Држави, со кој се ограничува стратешкиот нуклеарен арсенал на двете страни, но се закани дека ќе изврши нови нуклеарни тестови доколку САД го сторат тоа прво.