Запрашан од новинарите дали мисли дека Нетанјаху го отежнува конфликтот од свои политички причини, Бајден рече дека секако е оправдано луѓето да дојдат до тој заклучок
Американскиот претседател Џо Бајден во интервју за магазинот „Тајм“ објавено во вторникот, изјави дека израелскиот премиер Бенјамин Нетанјаху можеби ја одолговлекува војната во Газа од политички причини.
Бајден го дал интервјуто на 28 мај, неколку дена пред да го претстави предлогот за прекин на огнот во Газа и во време кога Нетанјаху се соочува со длабоки политички поделби во Израел.
Запрашан од новинарите дали мисли дека Нетанјаху го отежнува конфликтот од свои политички причини, Бајден рече дека секако е оправдано луѓето да дојдат до тој заклучок.
Бајден, кој се залага за крај на речиси осуммесечната војна, исто така рече дека не е сигурно дека израелските сили извршиле воени злосторства во Газа.
Во Газа загинаа повеќе од 36 илјади луѓе
Минатиот месец, обвинителите на Меѓународниот кривичен суд во Хаг побараа налози за апсење на Нетанјаху и неговиот шеф на одбраната, како и тројца водачи на Хамас за наводни воени злосторства.
Израел започна воздушна и копнена офанзива во Газа минатиот октомври, ветувајќи дека ќе ја уништи палестинската исламистичка група Хамас откако го нападна јужниот дел на Израел, убивајќи околу 1 200 луѓе и земајќи 250 заложници, според израелските податоци. Околу 120 заложници сѐ уште се во Газа.
Повеќе од 36 000 луѓе се убиени во нападот на Израел врз Газа, според тамошните здравствени власти кои велат дека уште илјадници тела се закопани под урнатините.
Анкетите покажуваат дека повеќето Израелци ја поддржуваат војната
Анкетите покажуваат дека повеќето Израелци ја поддржуваат војната, но во исто време го обвинуваат Нетанјаху за безбедносни пропусти кога вооружени лица на Хамас упаднаа во израелските градови во близина на Газа на 7 октомври и не би гласале за него на изборите.
Масовните улични протести станаа неделни настани кои привлекуваат десетици илјади луѓе кои бараат од владата да стори повеќе за да ги врати заложниците киднапирани од Хамас на 7 октомври и бараат оставка од Нетанјаху.