Од ЦУК велат дека во четвртокот добиле известување од страна на „Национални шуми“, дека поради немање финансиски средства во буџетот, тие во моментот немаат средства ниту за опскрбување на возилата со гориво, ниту да излезат и да можат да интервенираат согласно оперативните планови со кои располагаат
Авионите за гаснење пожари со кои располага државата се исправни, но проблем е што нема пилоти што ќе управуваат со нив, вели државниот советник за организација и функционирање на Системот за управување со кризи, Драги Тарчуговски.
Сепак, Тарчуговски вели дека со „ертракторите“ управува Дирекцијата за заштита и спасување (ДЗС) и тие треба подетално да кажат дали се исправни и дали може да бидат оперативни.
Тој вели дека секаде во светот недостасуваат пилоти за „ертракторите“ и тоа пред сѐ во Европа, а во медитеранските земји, додава дека имаат постојано отворени конкурси.
„И јас би сакал да бидам пилот, но, не може лесно да се биде пилот. Сепак, за да се биде на ‘ертрактор’ е дури потешко отколку пилот на обичен, комерцијален авион што превезува стотина патници. Зашто тој треба да полни вода во лет, треба да испушта вода на точно определена точка, тоа е една од најкомплицираните професии“,
рече Тарчуговски денеска одговарајќи на новинарски прашања.
Во однос на тоа дали проблемот е што нема интерес од граѓаните да се пријават и да ги поминат обуките за пилоти на „ертрактори“ или, пак, платите се ниски, Тарчуговски рече дека тие се платени согласно можностите што ги има во моментов.
„Дали е тоа доволно или не, бидејќи имаше некои изјави дека пилотите што се отидени во пензија би продолжиле да работат хонорарно доколку им се обезбеди 3 000 евра плата месечно, тоа се работи што ќе ги разгледа новата влада и ќе пресече вака или онака. Тоа е прашање што заслужува посебно внимание бидејќи станува збор за клучен персонал што не е лесно да биде обучен. А дали е висока или ниска платата, е сосема друго прашање“,
рече Тарчуговски.
Горан Стојановски, раководител на Секторот за операции и кординации во Центарот за управување со кризи, рече дека летово за пожари, на располагање имаат три хеликоптери од Министерството за внатрешни работи (МВР) и еден од Армијата.
„Ни остануваат на располагање три хеликоптери од МВР и еден хеликоптер од Армијата, интервентен, затоа што тој е оперативен, меѓутоа кога ќе имаме такви ситуации, ќе може да го користиме секако“,
рече Стојановски.
Според него, голем проблем е што во четвртокот добиле известување од страна на „Национални шуми“, дека практично поради немање финансиски средства во буџетот, тие немаат во моментот средства ниту за опскрбување на возилата со гориво, ниту да излезат и да можат да интервенираат согласно оперативните планови со кои располагаат.
„Така да, останува да се потпреме исклучиво на Бригадата и ТППЕ-единиците што ги имаме во рамки на општините, како и доброволните противпожарни друштва, како и МВР“,
рече Стојановски.
Како ќе биде понатаму, додава тој, и дали владата ќе преземе нешто во таа насока и ќе обебеди средства за потребите на „Национални шуми“, ќе видиме. Сега за сега, вели Стојановски, состојбата е исклучително тешка.
И двајцата се согласија дека поради високите температури, веруваат оти и летово ќе имаме пожари на отворен простор.