Дискриминацијата по националност е и прекршување на нашиот договор со Вимблдон, кој вели дека влезот на играчи се базира исклучиво на АТП ранг листата
Организаторите на Вимблдон попладнево официјално потврдија дека одлучиле да им забранат на руските и белоруските играчи да настапат на Вимблдон, кој е на програмата од 27 јуни до 10 јули
По одлуката на Вимблдон да им забрани учество на руски и белоруски тенисери поради ситуацијата во Украина, Асоцијацијата на професионални тенисери (АТП) го критикуваше ваквиот потег, нарекувајќи ја одлуката „неправедна“.
Според АТП, забраната е дискриминаторска и претставува штетен преседан.
На руските и на белоруските играчи им беше дозволено да се натпреваруваат на АТП турнирите од почетокот на војната во Украина, иако не можеа да ги користат нивните национални знамиња.
ИТФ веќе им забрани на тимовите од двете земји да учествуваат на Дејвис купот и Купот на Били Џин Кинг.
„Веруваме дека денешната еднострана одлука на Вимблдон да ги исклучи играчите од Русија и Белорусија од овогодинешните турнири на трева не е фер и има потенцијал да постави штетен преседан“,
се вели во соопштението на АТП.
„Дискриминацијата по националност е и прекршување на нашиот договор со Вимблдон, кој вели дека влезот на играчи се базира исклучиво на АТП ранг листата. Силно ја осудуваме руската инвазија на Украина и се солидаризираме со милионите невини луѓе погодени од тековната војна. Нашиот спорт е горд што функцинира на основните принципи на заслуги и правичност, каде играчите се натпреваруваат како поединци за да го достигнат своето место на турнирите базирани на АТП“,
се вели во реакцијата.
Вториот тенисер во светот Русинот Данил Медведев е најдобриот играч кој е засегнат од забраната на Вимблдон.
Во моментов, АТП инсистира дека не планира да го промени својот став околу дозволувањето на Русите и Белорусите да учествуваат на нивните турнири.
„Важно е да се нагласи дека на играчите од Русија и Белорусија сепак ќе им биде дозволено да се натпреваруваат на АТП турнирите под неутрално знаме, што е позиција која досега беше позната во професионалниот тенис“,
велат од АТП.
И официјална Москва ја осуди денеска одлуката годинешниот Грен – слем турнир во Вимблдон да мине без настап на руски тенисери, како дел од меѓународните санкции поради инвазијата врз Украина.
Портпаролот на Кремљ, Димитриј Песков, рече дека е неприфатливо на руските тенисери да им биде забранет настап на Вимблдон.
„Уште еднаш руските спортисти се држат како заложници на политички предрасуди и политичките интриги. Ова е неприфатливо“,
изјави Песков.
Тој додаде дека таквата одлука ќе влијае и врз самото натпреварување, бидејќи Русија има неколку тенисери на врвот на светската ранг-листа во машка и женска конкуренција.
Организаторите на Вимблдон попладнево официјално потврдија дека одлучиле да им забранат на руските и белоруските играчи да настапат на Вимблдон, кој е на програмата од 27 јуни до 10 јули.