„Учиме и одиме напред“, рече грчкиот премиер Киријакос Мицотакис на вчерашната владина седница и им се извини на граѓаните поради новонастанатата ситуација, осврнувајќи се на проблемите предизвикани од снегот и коментирајќи оти постоеле пропусти и недостатоци
Онлајн настава за учениците, работа од дома за вработените во јавниот сектор, силна препорака истото да важи и за приватниот сектор, се дел од одлуките на грчката влада за областа Атика, поширокиот регион на Атина, а истите правила важат и за островот Крит.
По вчерашната владина седница, портпаролот Јанис Иконому соопшти дека градинките, основните и средните училиштата денеска и утре ќе останат затворени, а учениците ќе следат онлајн настава. Затворени ќе бидат и судовите, продавниците ќе работат со скратено работно време од 10 до 18 часот, а забранети се услугите за достава до дома.
Снегот што обилно паѓаше во понеделникот создаде низа проблеми во поширокиот регион на Атина, а сè уште во делови од градот во прекин е снабдувањето со електрична енергија.
Вчера и завчера со одлука на владата беа неработни денови, а училиштата и градинките се затворени од понеделникот.
Грчкиот премиер Киријакос Мицотакис пред вчерашната владина седница им се извини на граѓаните поради новонастанатата ситуација, осврнувајќи се на проблемите предизвикани од снегот и коментирајќи оти постоеле пропусти и недостатоци.
За хаосот на автопатот „Атики Одос“, кој ги поврзува атинските предградија, каде што возачи и по 12 часа останаа заглавени во своите автомобили, Мицотакис им се извини на граѓаните и истакна дека одговорноста е на приватната компанија – концесионер и затоа возачите ќе добијат отштета од 2 000 евра.
Тој призна оти проблеми немаше само на конкретниот автопат, туку и на централни улици и булевари во поширокиот регион на Атина.
„Вистина е дека инфраструктурите на една медитеранска земја не се секогаш приспособени за услови на обилни снежни врнежи. Иако насекаде во светот многу снег носи големи проблеми. Но, исто така, вистина е дека државниот механизам сè уште не е на потребниот степен на подготвеност за феномени со толку голем интензитет. А тоа пред сè се однесува на координацијата меѓу инволвираните: државата, локалната самоуправа, периферијата, општината и поединците. Јасно е и ако треба да извлечеме поука од неуспешното справување со ова снежно невреме е фактот што во услови на криза центрите, раководителите на сите овие структури, мора да бидат заедно, веднаш и заедно да одлучуваат и да дејствуваат“,
рече грчкиот премиер.
Додаде дека во оваа насока ќе следат и промени за да постојат комисии за управување со кризи за во иднина да нема појави на недоразбирање, доцнење во одлучувањето итн.
„Учиме и одиме напред“,
порача Мицотакис на крајот од своето обраќање на владината седница.