Еден од првите чекори на пратеничката група на ВМРО-ДПМНЕ во Собранието ќе биде поднесување на нов Закон за потекло на имот на функционерите и политичарите, рече денеска портпаролот на партијата Димче Арсовски, одговарајќи на новинарски прашања.
„Претседателот Мицкоски пред неколку дена на своја прес-конференција јасно потенцираше дека еден од првите чекори на пратеничката група на ВМРО-ДПМНЕ ќе биде поднесување на нов Закон за потекло на имотот на функционерите и политичарите, сегашни, бивши. Оние кои што биле на високи функции во минатото, но и нивните семејства“,
рече Арсовски.
Тој вели дека како што говореле и за време на кампањата, Законот за потекло на имот на функционери е нивно предизборно ветување, а очекува поддршка и од останатите партии.
„Го ветивме изминативе месец до два, тоа го ветуваа и останатите партии така да очекуваме дека ќе добиеме поддршка во тој дел и од останатите партии. Да не останат само декларативни заложби како што сите останати политички лидери тоа го форсираа во јавност, но не го исполнија. Затоа ние еден од првите чекори кои што ќе ги направиме во Собранието ќе биде токму Законот за потекло на имот на политичарите, и очекуваме поддршка од сите политички лидери“,
рече Арсовски.
За нов Закон за потекло на имот на функционерите, политичарите и нивните семејства, досега има ветување и од СДСМ, тие во вчерашното соопштение до јавноста рекоа дека
прочистување на правосудството и проверка на потеклото на пари и имот на секој функционер ќе биде нивни приоритет откако ќе ја формирале новата влада.
Ваков законот побара и Државната комисија за спречување на корупцијата (ДКСК). Според претседателката на комисијата, Билјана Ивановска од досегашното искуство кое го имаат, не секогаш оној кој се стекнува со имот, го става имотот на свое име.
„Тоа е најголемиот проблем што сега можеме да го истакнеме. Значи се врши дисперзија на имотот на некои други блиски роднини во фамилијата, дури и не мора да се блиски како семејство, може да се блиски пријатели. Затоа ние како Комисија сме согласни и едногласни да бараме од новиот парламентот да смогне сили или политичка волја и да донесе Закон за потекло на имотот на сите граѓаните. Дури тогаш ќе имаме темелна слика за тоа каде е имотот и кој располага со имотот. Тоа може да се направи и ќе биде голем чекор напред за сите, за нашата држава“,
рече Ивановска во интервју за „Слободен печат“.