Арсовска му врати на Џафери: Ако в.д. премиерот од Форино не знае дека сам треба да си го уреди сопствениот двор, таа лекција ни денес нема да ја научи

Јавното претпријатие „Паркови и зеленило“, според Арсовска, ги одржува градските булевари и паркови, површини кои се во надлежност на претпријатието со закон и ако сака, како што рече, в.д. премиерот од Форино да ги ангажира да работат во Владата за тоа треба да склучи договор, исто како и секоја друга институција во Македонија

Ако досега Талат Џафери не знае дека сам треба да си го уреди сопствениот двор, сигурно е дека таа лекција ни денес нема да ја научи.

Ова на својот фејсбук-профил го напиша градоначалничката на Град Скопје, Данела Арсовска, како одговор на денешната изјава на премиерот во техничката влада Талат Џафер, кој на новинарско прашање зошто не е искосена тревата во дворот околу објектот на Владата рече дека жали што изгледот на дворот на Владата е во таква состојба, но следствено на тоа, како што рече тој, на изборите соодветен одговор добила и градоначалничката на Град Скопје, Данела Арсовска.

Џафери посочи и дека Владата нема ингеренции ниту можност да предвиди средства за косење на тревата, оти земјиштето е во надлежност на Градот Скопје, а „Паркови и зеленило“ како јавно претпријатие треба да се грижи за изгледот на главниот град.

„На денешната прес-конференција во Влада, в.д. премиерот Талат Џафери избегнува одговорност и манипулира со некакви процедури само за него познати лажејќи дека сопственост и надлежност на Град Скопје и ЈП ‘Паркови и зеленило’ било да се грижи за зеленилото во Владата. Ако досега Талат Џафери не знае дека сам треба да си го уреди сопствениот двор, сигурно е дека таа лекција ни денес нема да ја научи. Од в.д. премиерот од Форино, што кога излегува од дома до Владата ги гаси попатно сите семафори и прави хаос низ градот, не е ни очекувано дека би требало да знае што е негова обврска. Тој само знае какви бенефиции може да искористи“,

напиша Арсовска на Фејсбук.

Јавното претпријатие „Паркови и зеленило“, како што појасни Арсовска, ги одржува градските булевари и паркови, површини кои се во надлежност на претпријатието со закон.

„Ако сака в.д. премиерот од Форино да ги ангажира да работат во Владата, за тоа треба да склучи договор, исто како и секоја друга институција во Македонија“,

вели градоначалничката на Град Скопје.

Џафери за неискосената трева во дворот на Владата: Тоа е надлежност на Градот Скопје, а соодветен одговор од граѓаните доби и Арсовска на изборите

Претходно Џафери рече дека жали што изгледот на дворот на Владата е во таква состојба, но следствено на тоа, како што рече тој, на изборите соодветен одговор добила и градоначалничката на Град Скопје, Данела Арсовска.

„Граѓаните гледаат, граѓаните оценуваат, вреднуваат и со го дадоа својот одговор“,

рече тој.

Инаку, веќе подолг период, дворот и околината на Владата е обраснат со висока трева.