Арсовска најави и дека партијата Нова алтернатива на парламентарните избори со свои листи ќе оди во сите шест изборни единици. На прашањето дали можеби ќе биде кандидат за претседател, таа одговори негативно
Данела Арсовска, скопската градоначалничка и претседателката на партијата Нова алтернативана, на претстојните парламентарни избори ќе се кандидира во првата изборна единица. Ова денеска во емисијата „Студио 10“ на ТВ 24 го најави самата посочувајќи дека партијата на претстојните парламентарни претседателски избори ќе настапи со, како што рече, сите капацитети што ги има партијата.
„Тој дуел што ќе биде во изборна единица еден треба граѓаните да го очекуваат со нетрпение“,
рече таа.
Според неа, Нова алтернатива функционира и се консолидира, а најави и дека носителите на изборните единици ќе бидат објавени наскоро.
„Органите на партијата си заседаваат, разговараат за најгорливите прашања што ги засегаат граѓаните. Во овој момент се движиме по комитетите да видиме какво е расположението на терен меѓу граѓаните. Од она што го гледаме засега е дека граѓаните се разочарани од овие политички елити, кои ги лажат 30 години. Гласот на граѓаните е нешто што е најреално и најискрено и така се добива вистинското сознание за состојбата. Тоа го знаеме и од тоа што го отворивме телефонскиот број за поплаки на граѓаните на Град Скопје. Имаме над десетина илјади предлози, поплаки. Не е секогаш пријатно да слушнете критики, но тоа е единствениот начин да се поправите“,
вели таа.
Арсовска најави и дека партијата Нова алтернатива на парламентарните избори со свои листи ќе оди во сите 6 изборни единици. На прашањето дали можеби ќе биде кандидат за претседател, таа одговори негативно.
„Кој ќе биде кандидат за претседател или кој ќе бидат оние на листите за пратеници, тоа е нешто кое ќе го кажат органите на партијата откако ќе ги проценат сите позитивни и негативни страни, кои се слабостите. Ќе учествуваме на овие избори со сите капацитети со кои располагаме. Сакаме да им покажеме на граѓаните дека може поинаку и подобро да се работи, дека може одговорно и чесно да се работи. Дека ќе се обиде да си го реализира и да си стои на зборот на она што го ветил. Освен ако не е опстриуран од овие политиканти. Ова е нешто од нивна страна нешто што не може да го видите. Како дува ветрот така ги менуваат и изјавите. Време е да видат граѓаните одговорен политичар. Нешто што може – може, нешто што не може – не може,
рече таа.
Смета дека во последните две години успеале да реализираат повеќе отколку нивните претходници за 15 години.
„Само, за жал, нема кој тоа да го пренесе да видат граѓаните кој тоа го реализира. Со кои предизвици сме се соочиле знаат оние кои не опстриураат. Ќе одиме на избори, да видиме, да се измериме. Колку и да добиеме гласови, наши си се. Велат дека не им значат тие сто гласа, ама ќе видиме. Ако се неколку илјади или неколку стотици илјади, тогаш ќе видиме“,
вели Арсовска.
Со промовирање пет постулати за кои ќе се залага во политичките води, актуелната скопска градоначалничка Данела Арсовска на 17 јануари беше поставена за нов претседател на партијата Нова алтернатива.
Со Арсовска која, како што рекоа од партијата, за претседател е поставена со едногласна одлука на сите делегати и на покана на претседателството, Нова алтернатива очекува нови успеси и рекордна поддршка за претстојните парламентарни избори.
Претседателот на СДСМ и премиер, Димитар Ковачевски, и првиот човек на опозициската ВМРО-ДПМНЕ, Христијан Мицкоски, веќе објавија дека на следните избори ќе се кандидираат во првата изборна единица.
И лидерот на Левица, Димитар Апасиев, на претстојните парламентарни избори ќе се кандидира во првата изборна единица.
Парламентарните избори се закажани за 8 мај годинава, во ист ден со вториот круг од претседателската трка.