Иницијативата за времено отстапување на Универзалната сала од Градот Скопје на Владата беше поднесена од советничката група на СДСМ на почетокот на месецов со образложение дека доколку Арсовска не сака и не може да ја доврши реконструкцијата на објектот, тоа може да го стори Владата која е и финансиер на овој проект
Одговарајќи на новинарско прашање на денешната прес-конференција дали би ѝ ја отстапила Универзалната сала на Владата, Арсовска рече дека таа од позиција на градоначалник нема можност да носи такви одлуки
Одлуката за времено отстапување на Универзалната сала на Владата од страна на Градот Скопје е одлука која јас како градоначалник ниту можам ниту сакам да ја донесам, кажа скопската градоначалничка Данела Арсовска пред почетокот на денешната седница на Советот на Град Скопје на чиј дневен ред ќе се најде и оваа иницијатива.
Иницијативата за времено отстапување на Универзалната сала од Градот Скопје на Владата беше поднесена од советничката група на СДСМ на почетокот на месецов со образложение дека доколку Арсовска не сака и не може да ја доврши реконструкцијата на објектот, тоа може да го стори Владата која е и финансиер на овој проект.
Одговарајќи на новинарско прашање на денешната прес-конференција дали би ѝ ја отстапила Универзалната сала на Владата, Арсовска рече дека таа од позиција на градоначалник нема можност да носи такви одлуки.
„Тоа не е одлука којашто јас како градоначалник можам или сакам да ја направам. Иницијативата беше покрената од советниците, како што впрочем ги покренуваат сите иницијативи, и за тоа тие самите треба да одлучат. Да видиме во која насока се движи дискусијата и кое е всушност барањето коешто претендираат да го постават на дневниот ред на денешната седница на Советот“,
рече Арсовска пред почетокот на денешната седница на градскиот совет.
Градоначалничката посочи дека реконструкцијата на Универзалната сала е соочена со многубројни проблеми поради, како што рече, несоодветното планирање и проектирање и додаде дека тоа најверојатно е и причината поради која оваа иницијатива ќе се најде на денешната седница на Советот.
Советничката група на СДСМ на почетокот на месецов поднесе иницијатива за времено отстапување на Универзалната сала од Градот Скопје на Владата и ги повика советниците од останатите советнички групи да ја поддржат, со цел нејзината реконструкција да заврши што побрзо.
Околу преземањето на Универзална сала од страна на Министерството за култура се говори уште од ноември минатата година кога министрите за култура и за локална самоуправа, Бисера Костадиновска-Стојчевска и Ристо Пенов, беа на средба со градоначалничката Данела Арсовска, од каде што излегоа со тврдење дека Универзалната сала целосно ќе биде преземена од Министерството за култура, за што добиле согласност од градоначалничката.
Потоа од Град Скопје испратија соопштение во кое беше наведено дека на заедничката средба се договориле дека во следните денови ќе се изнајде заедничко прифатливо решение за да продолжи изградбата во интерес на граѓаните, за што од Министерството треба да добијат писмено барање, по што ќе се изјаснат.
Но, оттогаш министерката за култура во неколку наврати кажа дека досега немаат добиено никаков одговор од Град Скопје ниту, пак, им е доставена состојба, што е направено во Универзална сала.
Министерката за култура и на последната средба со новинарите минатиот месец објасни дека ѝ имаат предложено на градоначалничката Данела Арсовска да ѝ помогнат околу реконструкцијата.
„Универзална сала заедно со уште пет други институции во 2005 или 2006 година го поминале тој процес на децентрализација и станале надлежност на Град Скопје. Може да седнеме и да се договориме да помогнеме околу завршување на реконструкцијата. Бевме со министерот за локална самоуправа на состанок со градоначалничката каде таа се согласи дека ќе направиме промена на инвеститор, односно Министерство за култура ќе се јави како инвеститор, ќе ја изградиме Универзална сала и потоа повторно ќе ја вратиме на Град Скопје бидејќи не може да правиме процес кој е обратен на децентрализација“,
додаде Костадиновска-Стојчевска.
Костадиновска-Стојчевска и тогаш упати апел до градоначалничката и Советот на Град Скопје да излезат во пресрет бидејќи Скопје е влезено во потесен избор да биде Европска престолнина на културата во 2028 година, а Универзална сала е институцијата која аплицирала.