Уредбата усвоена на синоќешната седница на Владата предвидува дека за време на вонредната состојба војската може да учествува во чување на границата, контрола на сообраќајот на патиштата и во обезбедување витални објекти што инаку е во исклучива надлежност на полицијата
Армијата ќе биде поддршка на полицијата за време на вонредната состојба прогласена заради поуспешно справување со заразата со коронавирусот.
Со Уредбата за утврдување на задачи на Армијата на Република Северна Македонија за време вонредната состојба, донесена на синоќешната владина седница, меѓу другото, се вели дека Армијата формира и ангажира сили за поддршка на полициските сили на Министерството за внатрешни работи за:
-обезбедување и надзор на граничната линија на државната граница со цел спречување на влез и излез на сите лица кои имаат намера да извршат нелегален премин на државната граница;
-контрола на влез и излез на патните правци кои водат кон населените места преку воспоставување на мобилни пунктови и контролни точки;
-физичко обезбедување на витални објекти кои се обезбедувани од Министерството за внатрешни работи.
Уредбата, исто така, определува дека Армијата формира и ангажира сили и за поддршка на единиците на локалната самоуправа, органите на државната управа или на други државни институции на Република Северна Македонија, со цел спречување на ширење на епидемијата и отстранување на последиците настанати од епидемијата за укажување на помош заради спасување на луѓето и материјалните добра.
Армијата е веќе ангажирана за спроведување на кризната состојба во општините Дебар и Центар Жупа.