Предметот по кој Апелација одлучувала во средата се однесува на првостепената пресуда што во јули лани ја донел Основниот кривичен суд по процесот во кој на Јованов му се судело за поседување и продажба на марихуана и кокаин
Апелацискиот суд од Скопје денеска соопшти дека ја преиначил првостепената пресуда со која Васил Јованов беше упатен во воспитно-поправен дом и го осуди на затворска казна од три години и 10 месеци.
Во соопштението од Апелацискиот суд се вели дека одлуката е донесена на нејавна седница што се одржала пред два дена.
Инаку, Васил Јованов е 20-годишното момче кое е осомничено дека на 29 јануари смртно ја прегази две години повозрасната Фросина Кулакова додека поминувала на пешачки премин на булеварот „Партизански одреди“.
Предметот по кој Апелација одлучувала во средата се однесува на првостепената пресуда што во јули лани ја донел Основниот кривичен суд по процесот во кој на Јованов му се судело за поседување и продажба на марихуана и кокаин.
Првостепената пресуда беше во Апелација поради жалбите што ги поднеле и обвинетиот Јованов и Основното јавно обвинителство Скопје.
Според Апелација, жалбата на Јованов е одбиена како неоснована, а онаа на Обвинителството е уважена.
„Решението на Основниот кривичен суд Скопје К.бр.1439/24 од 31.07.2024 година, го преиначи во делот на одлуката за кривичната санкција – изречената заводска мерка Упатување во воспитно-поправен дом на начин што за кривичното дело Неовластено производство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик му се утврдува казна затвор во траење од 1-една година и за кривичното дело Неовластено производство и пуштање во промет на наркотични дроги, психотропни супстанции и прекурсори од член 215 став 1 в.в член 22 од Кривичниот законик му се утврдува казна затвор во траење од 3-три години и согласно член 44 став 2 точка 2 од Кривичниот законик, се осудува на единствена казна затвор во траење од 3– три години и 10-десет месеци“,
се вели во соопштението од Апелацискиот суд.
Одлуката на Апелација за затворската казна за Јованов е правосилна.
Откако во јавноста се дозна дека против осомничениот Јованов се водел судски процес за поседување наркотици, кој завршил со воспитна мерка, Кривичниот суд минатата недела, иако неправосилна, ја објави пресудата.
Во дел од образложението во неа се дека воспитната мерка – упатување во воспитно поправен дом е адекватна, а судот ги ценел личноста на обвинетиот, неговата младост и недоволното животно искуство, опкружувањето во кое се нашол во време на сторување на делата, „во друштво каде што консумирањето наркотици очигледно било секојдневие“.
Од Судот реагираа и вчера наведувајќи дека судијата Даниела Алексовска-Стојановска при одлучувањето за санкцијата се водела исклучиво согласно законските одредби, слободното судиско убедување и воспоставената судска пракса, како и наводите на јавниот обвинител.
Оттаму како неточни ги отфрлија шпекулациите дека обвинетиот бил претходно осудуван и се воделе други кривични постапки против него.
За утре во Неготино е најавен нов протест на кој ќе се бара правда за смртта на 22-годишната Фросина Кулакова.
Претходно минатата недела во Скопје се одржаа два протести на кои студенти и граѓани бараа одговори за околностите кои доведоа младата девојка да го загуби својот живот на таков начин.