Според решението на Апелацискиот суд Скопје, условниот отпуст на ексминистерот за транспорт и врски ќе почне на 17 јуни годинава и тој ќе остане на слобода доколку во меѓувреме не стори друго кривично дело
Ексминистерот за транспорт и врски Миле Јанакиески, кој издржува затворска казна за случајот „Титаник“, во јуни излегува на слобода откако скопска Апелација донесе одлука тој да добие условен отпуст. На предвремено ослободување од издржувањето на казната затвор се надева и поранешниот шеф на поранешната Управа за безбедност и контраразузнавање (УБК), Сашо Мијалков, но за него, според одлука на Апелацискиот суд, допрва треба да се произнесе Основниот кривичен суд Скопје.
Двете одлуки во врска со барањата на Мијалков и Јанакиески за добивање условен отпуст Апелацискиот суд Скопје ги објави денеска.
Во врска со Мијалков, од Апелација соопштија дека ја уважиле неговата жалба и предметот го вратиле на повторно одлучување пред скопскиот кривичен суд.
„Апелацискиот суд Скопје постапувајќи по жалба на осудениот С.М., од С., а изјавена преку Казнено-поправниот дом од отворен вид – Струга, донесе решение со кое жалбата се уважува, а предметот се укинува и се враќа на повторно постапување и одлучување пред првостепениот суд“,
се наведува во соопштението на Апелација.
Жалбата на Мијалков, појаснуваат од второстепениот суд, е уважена откако претходно предлогот на директорот на затворот во Струга, Ваљон Ќука, за негов условен отпуст беше одбиен како неоснован.
Мијалков во струшкиот затвор, кој е од отворен тип, издржува казна од три години за случајот „Империја“ во кој призна вина и се спогоди со Обвинителството за гонење на организиран криминал и корупција. Покрај затворската казна на ексшефот на УБК му е одземе имот вреден околу три милиони евра, меѓу кои 25 стана и парцелата до хотелот „Мериот“.
На неодамнешните аукции кои ги организираше Агенцијата за управување со одземен имот, дел од конфискуваниот недвижен имот на Мијалков беше продаден. Сепак, дел од продадени станови завршија повторно во кругот на неговото потесно семејство бидејќи купувач беше еден од неговите синови.
Во меѓувреме, контроверзните измени на Кривичниот законик од 6 септември лани донесоа застарување на делото злоупотреба на службената положба и овластување во повеќе предмети во кои се гонеше ексшефот на УБК, меѓу кои и главниот предмет за масовното прислушување „Таргет-Тврдина“.
Тој неодамна доби ослободителна пресуда во случајот „Трезор“ за набавката на опрема за следење на комуникации. Инаку, двата предмета – „Таргет-Тврдина“ и „Трезор“, се најдоа на повторно судење во Кривичен откако скопска Апелација кон крајот на 2022 година ги укина првостепените пресуди. Мијалков, кој во струшкиот затвор работи како возач, куртули и во предметот „Титаник 2“, кој се однесуваше на изборни нерегуларности, каде исто така го спасија измените на Кривичниот законик.
За разлика од Мијалков, кој ќе треба да чека на одлука од првостепниот суд, Апелација донесе решение со кое ја одбил жалбата на Основното јавно обвинителство за гонење на организиран криминал и корупција како неоснована, а ја прифатил жалбата на Миле Јанакиески поднесена преку неговиот бранител со која ексминистерот бара условен отпуст.
„Согласно донесеното решение на Апелацискиот суд Скопје, одлуката за условен отпуст е преиначена и условниот отпуст за осудениот М.Ј. наместо, како што гласеше првичната одлука, да започне на 16.01.2025 година, ќе започне на 17.06.2024 година, но под услов до истекот на условниот отпуст обвинетиот да не стори ново кривично дело“,
се наведува во соопштението од скопска Апелација.
Јанакиески беше осуден на три и пол години затвор во случајот „Титаник“ за изборни нерегуларности, откако, како и Мијалков во „Империја“, призна вина.
Инаку, „Титаник“ беше првиот случај за кој своевремено, на почетокот на 2016 година поранешното Специјалното јавно обвинителство (СЈО) отвори истрага.
Јанакиески и Коста Митроски, исто така осуден во „Титаник“, поднесоа барање за вонредно преиспитување на правосилната пресуда во предметот до Врховниот суд, кој по одржана седница кон крајот на јануари годинава го одби како неосновано.
Неколку месеци претходно, односно во Европскиот суд за човекови права (ЕСЧП) во Стразбур ја објави одлуката според која на Јанакиески незаконски му бил продолжуван притворот во случаите „27 април“ и „Шпански скали“.
Во меѓувреме измените на Кривичниот законик го спасија и Јанакиески од натамошно гонење во случаите „Топлик“ и „Талир“, поради застареност на делото.
На 1 ноември лани од затворот „Идризово“ излезе ексминистерката за внатрешни работи Гордана Јанкулоска откако Апелацискиот суд во Скопје ја уважи нејзината молба за условен отпуст од натамошно издржување на затворската казна за случајот „Тенк“.